Sýret: instagram.com/mfa_kz/
Ázerbaıjan mınıstriniń sapary Qazaqstan men Ázerbaıjan arasyndaǵy Strategııalyq seriktestik jáne odaqtastyq qatynastar týraly sharttyń 20 jyldyǵy aıasynda ótti. Kezdesý barysynda eki baýyrlas el arasyndaǵy saıasat, saýda, ekonomıka, energetıka, kólik, tranzıt, sondaı-aq mádenı-gýmanıtarlyq baılanystardy qosa alǵanda ekijaqty ózara is-qımyl máseleleriniń keń aýqymy talqylandy.
Syrtqy ister mınıstri ekijaqty qarym-qatynastardyń serpindi damýyn, memleket basshylarynyń strategııalyq maqsattarǵa qol jetkizýdegi saıası erik-jigeriniń rólin atap ótti.
– Qazaqstan men Ázerbaıjan ózara túsinistik pen senimniń joǵary deńgeıin kórsetedi. Bul bizdiń barlyq saladaǵy yntymaqtastyǵymyzdy dáıekti túrde damytýǵa múmkindik beredi. Biz ózara is-qımyldy, ásirese saýda-ekonomıkalyq jáne ınvestısııalyq salalarda odan ári keńeıtýge baǵyttalǵanbyz, – dedi M.Nurtileý.
Taraptar keıingi bes jylda qabyldanǵan sharalar arqyly bes esege ulǵaıyp, 2024 jyly 533,4 mln dollarǵa jetken taýar aınalymynyń aıtarlyqtaı óskenin qanaǵattanýshylyqpen atap ótti. Ekonomıkalyq yntymaqtastyqty odan ári tereńdetý maqsatynda bul kórsetkishti 1 mlrd dollarǵa deıin jetkizý nıetin rastady.
Kelissózderdiń mańyzdy taqyryby energetıka salasyndaǵy yntymaqtastyqty nyǵaıtý boldy. Mınıstrler Ázerbaıjan aýmaǵy arqyly qazaqstandyq energoresýrstardyń tranzıti salasyndaǵy tabysty ózara is-qımyldy quptady. Baký – Tbılısı-Djeıhan qubyry arqyly munaıdy tasymaldaý kólemi ótken jyldyń qorytyndysy boıynsha 1,4 mln tonnany quraǵan. Al ortamerzimdi keleshekte jylyna 2,2 mln tonna deńgeıine jetý kútilip otyr.
– Biz Qazaqstandy Ortalyq Azııadaǵy basty seriktes retinde qarastyramyz. Búgingi kelissózder kólik, ınvestısııalar, energetıka jáne bilim berýdi qosa alǵanda túrli baǵyttardaǵy yntymaqtastyqty odan ári nyǵaıtýǵa degen ózara umtylysty rastady, – dep málimdedi D.Baıramov.
Taraptar aýyl sharýashylyǵy, ónerkásiptik kooperasııa, ǵarysh jáne telekommýnıkasııa salasyndaǵy ózara is-qımyldy jandandyrýǵa kelisti. Yntymaqtastyqty nyǵaıtýǵa byltyr qurylǵan Qazaqstan – Ázerbaıjan tikeleı ınvestısııalardyń ınvestısııalyq qory yqpal etedi.
Kelissóz barysynda mádenı-gýmanıtarlyq yntymaqtastyqqa basa nazar aýdaryldy. Keıingi eki jylda elderde Qazaqstan men Ázerbaıjannyń mádenıet kúnderi ótti. Bıyl naýryzda Bakýde Qazaqstannyń 23 ýnıversıtetiniń qatysýymen qazaqstandyq joǵary bilim berý kúnderi ótip, onyń qorytyndysy boıynsha yntymaqtastyq týraly 40 memorandýmǵa qol qoıyldy.
Mınıstrler sondaı-aq óńirlik jáne jahandyq kún tártibiniń ózekti máselelerin talqylady, BUU, TMU, AО́SShK, TMD, IYU jáne Kaspıı sammıti sheńberinde odan ári yntymaqtastyqqa daıyndyǵyn rastady. Kelissóz qorytyndysy boıynsha 2025–2026 jyldarǵa arnalǵan simaralyq ózara is-qımyl josparyna qol qoıyldy.
– Búgingi basqosý memleketterimizdiń kópjylǵy jemisti yqpaldastyǵyn jańa ári sapaly deńgeıge kóterýdiń jáne qol jetkizilgen ýaǵdalastyqty júzege asyrý joldaryn saralap alýdyń oraıly sáti dep sanaımyz. Qazaqstan men Ázerbaıjan – qart Kaspııdiń qos jaǵalaýyna ejelden qonys tepken baýyrlas elder. Bizdi túbi bir túrkitildes halyqtar retinde ortaq tarıh, ózara jaqyn mádenıet jáne tamyrlas rýhanı qundylyqtar baılanystyrady, – dedi elimizdiń Syrtqy ister mınıstri Murat Nurtileý kelissózden keıingi BAQ ókilderi aldynda jasaǵan málimdemede.
Mınıstrdiń aıtýynsha, qazaq-ázerbaıjan qarym-qatynasy konstrýktıvti saıası dıalogtiń arqasynda qarqyndy damyp keledi.
