Saýda jáne ıntegrasııa mınıstrliginiń málimetinshe, ótken aptada áleýmettik mańyzy bar azyq-túlik ónimderiniń ortasha baǵa ındeksi 0,2%-dy qurady, bul 2025 jyldyń basynan bergi eń tómen kórsetkish. Saýda jáne ıntegrasııa birinshi vıse-mınıstri Aıjan Bıjanova 2025 jyldyń basynan beri áleýmettik mańyzy bar azyq-túlik ónimderi baǵasynyń ortasha ósimi 3,4%-dy quraǵanyn, biraq naýryz aıynyń basynan bastap baǵanyń ósý dınamıkasy 0,4%-ǵa báseńdegenin atap ótti. Bıylǵy jyldyń basynan beri eń joǵary baǵa ósimi kartopqa (+19,3%), qyryqqabatqa (+23,2%) jáne sıyr etine (+9,0%) tıesili. Sonymen qatar kúrishtiń (-3,4%), jumyrtqanyń (-2,1%) jáne unnyń (-0,3%) baǵasy tómendegeni baıqaldy.
«Baǵanyń eń joǵary ósimi Aqtóbe oblysynda (+0,8%), Shyǵys Qazaqstan jáne Pavlodar oblystarynda (+0,5%), Jetisý oblysynda (+0,4%) tirkeldi. Sonymen qatar Astana qalasynda (-0,2%) jáne Batys Qazaqstan oblysynda (-0,1%) baǵa ındeksi tómendedi», dep atap ótti A.Bıjanova.
Aýyl sharýashylyǵy vıse-mınıstri Erbol Tasjúrekov óńirlerdegi kókónis qorlarynyń bosatylý barysy týraly habarlady. Jergilikti atqarýshy organdardyń málimetinshe, 12 naýryzdaǵy jaǵdaı boıynsha áleýmettik-kásipkerlik korporasııalar (ÁKK) turaqtandyrý qorlary úshin kelisimshart jasaǵan kartop qory 41,3 myń tonnany quraıdy. Alaıda keıbir óńirlerde júrgizilgen tekserý nátıjesinde málimdelgen kólem men kartoptyń naqty qory arasynda aıtarlyqtaı aıyrmashylyq bar ekeni anyqtaldy.
Mańǵystaý oblysynda málimdelgen ÁKK-niń 2,5 myń tonnadan astamynyń tek 25 tonnasy ǵana naqty rastaldy. Shyǵys Qazaqstan oblysynda málimdelgen ÁKK-niń 1,6 myń tonnadan astamynyń tek 35 tonnasy ǵana bolǵan. Atyraý oblysynda málimdelgeni – 394 tonna, rastalǵany – 110 tonna.
Abaı oblysynda málimdelgeni 2,2 myń tonnadan astam, rastalǵany 183 tonna. Jambyl oblysynda málimdelgeni 2,6 myń tonnadan astam, tekserý nátıjesinde bar bolǵany 308 tonna rastaldy. Ulytaý oblysynda ÁKK 1,8 myń tonnadan astam dep málimdegenniń naqty 827 tonnasy bolǵan. Batys Qazaqstan oblysynda ÁKK málimdegen 2,3 myń tonnadan astamynyń 1,3 myń tonnasy rastaldy.
Anyqtalǵan kemshilikter negizinde vıse-premer oblys ákimderiniń orynbasarlaryna kartop qorlarynyń durys baqylanbaýyna baılanysty sógis jarııalady. Serik Jumanǵarın Úkimet áleýmettik mańyzy bar azyq-túlik ónimderiniń baǵasyn turaqtandyrý úshin barlyq qajetti sharalardy qabyldaǵanyn atap ótti. Máselen, asyltuqymdy maldardy eksporttaýǵa tyıym salyndy, kartopty úshinshi elderge eksporttaýǵa alty aıǵa shekteý engizildi, ımporttyq taýyq jumyrtqalaryn ákelýge tyıym engiziledi. Degenmen jergilikti atqarýshy organ tarapynan tıisti baqylaý bolmasa, qabyldanǵan sharalardyń nátıjeleri tıisti áser bermeıdi.
Qazirgi ýaqytta Qazaqstanǵa Pákistan men Qytaıdan arzan baǵadaǵy ımporttyq kartop jetkizý boıynsha jumystar belsendi túrde júrgizilip jatyr. Qazirdiń ózinde Saýda komıteti men «KTZ express» ekonomıkalyq operatorymen birge 4000 tonnadan asa kartop ımporttaldy, taǵy 700 tonna jolda.
Qosymsha, Aýyl sharýashylyǵy mınıstrligi men «Azyq-túlik korporasııasy» AQ birlesip kókónis baǵalaryn turaqtandyrý úshin ózara is-qımyl shemasyn ázirledi. Bul shema áleýmettik-kásipkerlik korporasııalar men «Azyq-túlik korporasııasy» arasyndaǵy ózara is-qımyl arqyly ónim jetkizý jáne óndirýshilerdi qarjylyq qoldaý kórsetý úshin qarastyrylǵan.
