Bul turǵyda Temir aýdany turǵyndary erekshe belsendilik tanytyp otyr. Aýdan ortalyǵy Shubarqudyq kentinde kósheler, jaıaý júrginshiler joly, mekemelerdiń jan-jaǵy, aýlalar men saıabaq, skver, aıaldamalardy qoqystan tazartyp, jınaýǵa kommýnaldyq mekemeler qyzmetkerleri men volonterler, belsendi turǵyndar bir kisideı jumyldy. Aýdan ákimdiginiń málimetine qaraǵanda, ekoaksııa aıasynda keıingi eki aıda 640 tonna turmystyq qatty qaldyqtar, 195 tonna qar shyǵarylǵan. Ekoaksııa kezinde volonterler kommýnaldyq qyzmet jumysshylaryna ystyq shaı taratty.
Qarǵaly aýdanynyń belsendi jastary da ekologııalyq aksııadan syrt qalmady. Olar aýdandaǵy kórikti jerlerdiń biri Qasqyr sarqyramasy mańaıyn qoqystardan tazartýdy bastama etip kóterdi. Aýdandyq jastar resýrstyq ortalyǵynyń belsendileri ár aýyldyq okrýgte tazalyq aksııasyn bir kúnde bastaýǵa úndeý tastady. Erikti jastar mektep oqýshylaryna qoǵamdyq oryndardy lastamaý, qoqys tastamaý týraly ekodárister júrgizdi.
Aqtóbe qalalyq máslıhatynyń depýtaty Raısa Balıevanyń aıtýynsha, tazalyq qorshaǵan ortany kútip ustaý ǵana emes, ol mádenıettiń, jaýapkershiliktiń, urpaqqqa úlgi bolýdyń kórinisi.
«Ásirese, mektepterde, oqý oryndarynda, qoǵamdyq oryndarda tazalyqqa mán berip, ony júıeli túrde nasıhattaý óte mańyzdy. Osy oraıda jergilikti bılik organdary, qoǵamdyq uıymdar men belsendi azamattar senbilikter uıymdastyryp qana qoımaı, turǵyndardy ekologııalyq mádenıetke tárbıeleý baǵytynda naqty qadamdar jasaýy kerek. Tek sonda ǵana «Taza Qazaqstan» jalpyhalyqtyq qozǵalysqa aınalyp, uzaq merzimdi nátıjesin beredi», deıdi depýtat.
Byltyr «Taza Qazaqstan» aksııasyna 400 myńnan asa aqtóbelik qatysyp, ózen-kólder jaǵalaýlaryn, saıabaqtar men tarıhı eskertkishter aınalasyn, qala kóshelerin tazalady. Aksııa aıasynda 291 saıabaq pen skver retke keltirilip, eldi mekender aýmaǵyna 300 myń túp aǵash, 6400 buta otyrǵyzyldy. Aýmaqtardy jınaýǵa 6203 tehnıka tartylyp, polıgondarǵa 74 270 tonna qoqys shyǵaryldy.
Aqtóbe oblysy
