Talanttar tanylǵan kún

Elorda kórermenderin Qallekı teatr óneriniń úzdik úlgilerimen tanystyrýdy murat etken aıtýly sahna dýmanyna bıyl jeti spektakl qatysty. Atap aıtsaq, olardyń qata­rynda M.Áýezovtiń «Qaragóz» (re­jısseri – Gúlsına Mırǵalıeva), Jáni­bek Álikenniń Mahabbatym – sen» (rejıs­seri – Bázil Sultanǵazy), ıtalııa dra­matýrgi Edýardo de Felıpponyń «Áıel qupııasy» (rejısseri – Bolat Uzaqov), «Ertegi túnniń áýeni» (rejısseri – Oljas Dálelhan), Georg Bıýhnerdiń «Voısek» (rejısseri – Ulan Qabyl), Tólen Ábdiktiń «Parasat maıdany» (rejısseri – Gúlsına Mırǵalıeva) jáne Per de Bomarsheniń «Fıgaronyń úılenýi» (rejısseri – Nurlan Jumanııazov) qoıylymdary bar.

Bir apta boıy sahna mamandarynan quralǵan sarapshylar alqasy teatr tynysyna den qoıyp, spektaklderdiń tolyq taldaýyn júzege asyrdy. Sonymen birge kórermender de ataýly óner merekesinen qalys qalmaı, teatr foıesine qoıylǵan saýalnamany toltyryp, súıikti akterleri men spektaklderine daýys berip, óz tańdaýyn jasaý múmkindigine ıe boldy. «Júzden júırik, myńnan tulpar» shyqqan úzdik jumystarǵa arnaıy atalymdar boıynsha dıplom men aqshalaı syılyqtar tabys etildi.

Sonymen sarapshylar sheshimi bo­ıynsha, «Teatr tarlany» atalymyndaǵy júlde Tólen Ábdiktiń «Parasat maıdany» psıhologııalyq dramasyndaǵy Beıtanys róli úshin Qazaqstannyń eńbek sińirgen qaıratkeri Nurken О́teýilge tabystalsa, «Úmit» syılyǵy Beıtanys 2 (jarmaq) beınesi úshin Marǵulan Namenovke berildi. «Ekinshi plandaǵy úzdik er adam róli» atalymyna Muhtar Áýezovtiń «Qaragóz» tragedııasyndaǵy Narsha róli úshin Bázil Sultanǵazy, al «Ekinshi plandaǵy úzdik áıel róli» atalymyndaǵy syılyqqa Georg Bıýh­ner­diń «Voısek» spektaklindegi róli úshin Aıaýjan Malǵajdarova laıyq dep tanyldy. Per de Bomarsheniń «Fıgaronyń úılenýi» mýzykalyq kome­dııa­­syndaǵy róli úshin Ánýar Bektas «Úzdik akter», Edýardo de Felıpponyń «Áıel qupııasy» dramasyndaǵy Fılý­mena Martýrano beınesi úshin Qazaq­stan­nyń eńbek sińirgen ártisi Janat Chaıkına «Úzdik aktrısa» atandy. Son­daı-aq sarapshylardyń arnaıy júl­desi­men Muhtar Áýezovtiń «Qaragóz» qo­ıy­lymyndaǵy Mórjan róli úshin Qazaq­stannyń eńbek sińirgen qaı­rat­keri Maıra Omar marapattal­dy. Al kórer­men tańdaýy boıynsha «Úzdik spektakl» tuǵyryna Qazaq­stannyń eńbek sińirgen qaıratkeri, Q.Qýanysh­baev atyndaǵy Qazaq ulttyq drama teatrynyń kórkemdik jetekshisi, rejısser Gúlsına Mırǵalıevanyń «Qaragóz» tra­ge­dııasy kóterilse, Qaragóz róli úshin «Daryn» Memlekettik jastar syı­ly­ǵynyń laýreaty Aqmaral Tana­baeva «Úzdik aktrısa», «Parasat maı­da­nyn­daǵy» rólimen Qazaqstannyń eńbek sińirgen qaıratkeri Nurken О́teýil «Úzdik akter» dep ­tanyldy.