TKSh-da halyqqa tıimdi ózgerister bolady

Keshe Ortalyq kommýnıkasııalar qyzmetinde Ulttyq ekonomıka vıse-mınıstri Qaıyrbek О́skenbaev pen «TKSh-ny damytý jáne jańǵyrtýdyń qazaqstandyq ortalyǵy» AQ basqarmasynyń tóraǵasy Sergeı Shaıjúnisov baspasóz máslıhatyn ótkizdi. Onda «Nurly Jol» baǵdarlamasy sheńberinde turǵyn úı-kommýnaldyq sharýashylyqty jańǵyrtý máselesi sóz boldy. «Nurly Jol» memlekettik baǵdarlamasy aıasynda jylý jáne sýmen jabdyqtaý, sondaı-aq sý burý júıesin jańǵyrtýǵa 450 mlrd. teńge bólinetin kórinedi. Infraqurylymdy damytýdyń 2015-2019 jyldarǵa arnalǵan memlekettik baǵdarlamasy aıasynda atalǵan maqsattarǵa jalpy alǵanda 450 mlrd. teńge bólinedi. Ol qarjynyń 60 mlrd. – 2015, 90 mlrd. teńgesi 2016 jyly ıgeriledi. Al, 2017-2019 jyldary jyl saıyn bul salaǵa 100 mlrd. teńgeden baǵyttalatyn bolady. Osy kezde jergilikti ákimdikter jalpy somasy 269,4 mlrd. teńgeni quraıtyn 200 jobany usynyp otyr. Aǵymdaǵy jyly atalǵan jobalardy júzege asyrý úshin 60 mlrd. teńge bólingendikten elimizdiń barlyq óńirinen 96 joba iriktep alyndy», dedi vıse-mınıstr. Búgingi kúni Qazaqstandaǵy jylýmen jabdyqtaý ınjenerlik jelileriniń jalpy uzyndyǵy 12,5 myń shaqyrymǵa jetedi eken. Oǵan qosa, gazben 29,4 myń, elektr energııasymen jabdyqtaýda 136,6 myń shaqyrymdy quraıdy. Budan bólek qýaty 100 gıgakolorııaǵa deıingi 5 646 qazandyq bar. Odan úlken qazandyqtar Energetıka mınıstrliginiń quzyryna kiredi. Osy málimetterdi alǵa tartqan spıker saladaǵy sheshimin kútken túıindi máselelerge de nazar aýdartty. Osy oraıda elimizdegi sýmen jabdyqtaý jelileriniń shamamen 24 paıyzy kúrdeli jóndeýdi qajetsinetinin aıtty. «Respýblıkadaǵy sýmen jabdyqtaý jelileriniń jalpy uzyndyǵy 61 myń shaqyrymdy quraıdy. Onyń 24 paıyzy kúrdeli jóndeýdi nemese tolyǵymen aýystyrýdy qajet etedi. Sondaı-aq, sý burý júıesiniń uzyndyǵy 15 myń shaqyrymǵa teń. Statıstıkalyq derekterge súıensek, bizdiń halqymyzdyń sany 17, 4 mln. adamdy quraıdy. Onyń 13,4 mln. adamy ortalyqtandyrylǵan sýmen jabdyqtaý júıesimen qamtamasyz etilgen. Onyń 86 paıyzy qala turǵyndary bolsa, aýyldy jerlerde ortalyqtandyrylǵan sýmen jabdyqtaý júıesine qosylǵan halyq sany 5,2 mln. adam. Al, jekelegen sýmen jabdyqtaý júıesin 3,9 mln. azamat paıdalanady», dedi Q.О́skenbaev. Baspasóz máslıhatynda turǵyn úı-kommýnaldyq sharýashylyǵy ınjenerlik ınfraqurylymdaryn jańǵyrtýǵa halyqaralyq ınstıtýttardyń qarjysy tartylatyny da aıtyldy. «Nurly Jol» ınfraqurylymdy damytý memlekettik baǵdarlamasyna sáıkes, halyqaralyq qarjy uıymdarynyń esebinen de qarjylandyrý boljanyp otyr. Qazirgi qolda bar jobalarǵa taıaý jyldardyń ishinde shamamen 20 mlrd. teńge tartýdy josparlap qoıdyq. Munymen birge, 2016 jylǵa da dál osyndaı kólemde sýbsıdııa bólý nemese ınfraqurylymdyq granttar tartý kózdelgen. Bul shara elimizdiń halqy úshin tarıfterdiń ósimine jol bermeý maqsatynda qolǵa alynyp otyr. Sýbsıdııa berýdiń erejesi ázirlenýde. Biz ony halyqaralyq qarjy uıymdarymen birlesip jasaýdamyz. Qazirgi ýaqytta atalǵan ereje kelisilýde. Buıyrtsa, ol jaqyn kúnderi qabyldanyp, bekitiletin bolady», dedi S.Shaıjúnisov bul týraly. Jýrnalısterdiń suraqtaryna jaýap bergen eki spıker de aldaǵy ýaqytta TKSh salasynda halyqqa tıimdi ózgerister oryn alyp, kóptegen ıgi sharalar atqarylatynyn aıtty. Nurbaı ELMURATOV, «Egemen Qazaqstan».