Bir kem áreket

Ákesiniń uıǵarymymen barmaǵan úıirmesi joq: shahmat, matematıka, fızıka, hımııa, taǵy ne, Qudaı-aý bári bar. Kil myqty muǵalimder balany úıine kelip oqytatyn. Túk shyqpady. Barshylyq áýleki dúnıelermen áýestený­ge jol ashty. Uly ne dese sony oryndaıtyn áke perzentiniń oqýǵa qyry joq ekenin kesh túsindi. Balanyń mıyn ashytýdy jón kórmedi. Aıady. Qataldyq tanytyp, talap qoıyp oqýǵa májbúrleýge bolýshy edi, biraq balasyn qınaǵysy kelmedi.

Áke qalaı degende de tuıa­ǵy­nyń tuǵyrly, ataqty adam bolýyn qalap, osy tilegin oryn­daýǵa jantalasyp jol izdedi. Ánshilik tuqymda joq, ebi de kelmeıdi. Endi ne? Tapty: sportta baq synaý. Kúres, boks, karate, voleıbol, fýtbol, júzý, taǵy ne bar edi, bári-báriniń basyn shaldyrdy. Aqyrynda sporttyń myń san túriniń birine toqtady. Balanyń qalaýymen.

Dene bitimi kelisti, qara kúshke de qara jaıaý emes ulynyń álem chempıony bolýyn, halyqaralyq týrnırde top jarýyn, Olımpıada­nyń altynyn alýyn shyn qalady. Izbasarynyń sportta joly bolaryna sengisi keldi. Ulynan birdeńe shy­ǵaryna onyń ózi sııaqty my­ǵym, tórtpaq, keń jaýryndy bitimi bar-tyn. Balanyń minezi, bolmysy ózinikine uqsamaıtyny ǵana ákeniń úmitiniń aqtalaryna kúmán týǵyzatyn. Mańdaıyna jel tıip, júzine kún sáýlesi túsip kórmegen bala bolbyr, bosań edi. Erik-jiger, ójettilik tabıǵatynda bar shyǵar, bolsa onysy qoldan tunshyqtyrylǵan. Ony oıatýǵa ákeniń túısigi jetpedi ne eljirektigi erik bermedi.

Áke yqpalymen sportta­ǵy jol bastal­dy. Barlyq kedergi alynyp tastaldy. Jeńiske yntalandyrýdyń neshe túri qoldanyldy. Nátıje joq. Biraq ákeniń qalaýy eshteńeni «tyńdar» emes... Úmitsizdik meńdedi. Kenet bási tómen bir týrnırde ǵaıyptan-taıyp bala júldeli boldy. Úmit oty qaıta oıandy. Taǵy shapqy­laý. Onyń ústine yqpaldy ákeniń yǵyna jyǵylǵysh jattyqtyrýshylar únemi «bala talantty, bolashaǵy zor, tek baǵy jan­baı júr» deıdi jalpaqtap. Bul da álgi súreńsiz joldan shyqpaýǵa sep. Úmit mazdatqysh.

Balanyń sporttaǵy jolyn dańǵyl etý barysynda barlyq tetik iske qosyldy. Baqtalas, básekeles talaı myq­tylar, talanttar, daryndy­lar joldan taıdyryldy, qoldan súrindirildi, Qula­gerdiń kebin kıdi. Bárinen de eń kúıindiretini básekeles­ter­diń  kóbisi jolynan jańylyp, sol kúıi sporttan birjola qol úzdi.  О́kinishti emes pe?.. Olarǵa qarata jaýapkershi­lik­ten jeńil qutyldyratyn «Buıyr­maǵan ǵoı...» degen sóz san ret aıtyldy...

Talaı ret kókke kóterilýge tıis Kók tý tasada «múlgıdi». Yqpaldy ákede kim bolsa da ult jalaýyn shyńǵa tikse eken dep, osynaý iri iske yqpal etý oıynda da joq. Kóksegeni – óz týyn ǵana jelbiretý. Kók týdy bıikte jelbiretsem degen tilek keremet-aq, biraq munyń astarynda esep-qısap jatqany jaman dá.

Ult jalaýynyń unjyr­ǵasy túsýine yqpaldy ákeler­diń «yqpaly» tıip-aq tur. Qaıtpek kerek?