Sýrette: Qazaqstan kompartııasynyń birinshi hatshysy Dinmuhamed Qonaevtyń ataqty shopan Shoman Sháripbaevqa marapat tapsyryp turǵan sáti.
...Sonaý shalǵaıdaǵy Moıynqum aýdanyndaǵy Hantaýynda qoı baǵyp, shopan atanǵan marqum Shókeńniń ómiri de keıingi urpaqqa úlgi-ónege bolarlyqtaı. Ol «Malshylardyń marshaly», eki márte Eńbek Eri, áıgili Jaz-ata – Jazylbek Qýanyshbaevtyń izin basqan, jolyn qýǵan senimdi shákirti retinde jaqsy tanylǵan edi.
Alǵashynda «Kókterek» keńshary, Komıntern bólimshesiniń,sońynan onyń negizinde qurylǵan «Hantaý» keńsharynyń aǵa shopany bolǵan, úsh Lenın ordendi jáne «Oktıabr revolıýsııasy» ordendi, respýblıka Memlekettik syılyǵynyń ıegeri, Qazaq KSR Joǵarǵy Keńesiniń depýtaty bolǵan Shoman Sháripbaevtyń dáreje dańqy bir basyna jeterlikteı edi. Degenmen 1981 jyly aqpan aıynda Shókeńe Keńes odaǵyndaǵy eń joǵarǵy Sosıalıstik Eńbek Eri ataǵy berildi.
Iá, «Eńbek er atandyrady» degen halyq sózinde naǵyz shyndyq, aqıqat bar. Shoman aǵa shopannyń qutty taıaǵyn qolyna ustap júrip, Máskeýdegi kásipodaqtar sezine de qatysty, Mońǵolııaǵa da saparlady, biraq bárinen de tóbesine kóterip,tórge shyǵarǵan týǵan eli men halqynyń yqylasyn aıtsańyzshy! Búginde aýdan ortalyǵyndaǵy Batyrlar alańynda shopan Shomannyń da keýde músini kóz tartyp,kóńil qýantyp tur.
Kezinde qazaqtyń asa áıgili kompozıtorynyń biri Eskendir Hasanǵalıev shyǵarǵan «Shopan dańqy» áninde (sózin jazǵan belgili aqyn Ábdirahman Asylbek) bylaı dep aıtylǵandaı:
Jarqyraǵan keýdesinde juldyzy,
Jadyraǵan jaz kúnindeı nur júzi.
Jazylbektiń jalyndy sol shákirtin
Ardaqtaǵan aýyldyń bar ul-qyzy!
– moıynqumdyqtar áli kúnge deıin ol kisiniń esimin erekshe eske alyp, atyn árdaıym ulyqtap keledi.
Berikbaı QADYQOV,
ardager jýrnalıst
Qarasaı aýdany
Almaty oblysy
