Almatydaǵy sý tasqynynan zardap shekken eldi-mekenderdegi turǵyndarǵa qalalyq Densaýlyq saqtaý basqarmasy men Qazaqstan-Reseı medısınalyq ýnıversıtetiniń birqatar sala mamandary medısınalyq kómek kórsetip, tegin dári-dármek taratty. Qalalyq medısınalyq kolledj stýdentteri men oqytýshylary, medbıkelerden quralǵan erikti volonterler 500 aýlany aralap, oqıǵa ornynda týyndaýy múmkin ınfeksııalyq aýrýlardyń aldyn alý maqsatynda aqparattyq nusqaýlyqtar taratyp, medısınalyq kómekti qajet etetin turǵyndarǵa dárigerlik kómek uıymdastyrdy.
Apat aıtyp kelmeıdi degen. Mine, birneshe kúnnen beri Almaty qalasynyń Naýryzbaı aýdanyndaǵy Qaraǵaıly, Taýsamaly, Quramys jáne Alataý aýdanyndaǵy Alǵabas eldi mekenderinde bolǵan sý tasqynynan zardap shekken turǵyndardan maza ketip, abyrjýly. Eń bastysy – adam shyǵyny joq. Degenmen, mundaı tabıǵı apat kezinde ınfeksııalyq aýrýlardyń, sondaı-aq, stress, psıhıkaǵa kúsh túskende burynǵy sozylmaly dertterdiń dendeýine ákelýi múmkin. Osyndaı jaǵdaıdy boldyrmaýdy aldyn ala eskergen qalalyq Densaýlyq saqtaý basqarmasynyń bastamasymen Qazaqstan-Reseı medısınalyq ýnıversıtetiniń jetekshi mamandary birlesip, ınfeksıonıst, travmatolog, hırýrg, kardıolog, psıholog, pedıatr dárigerler komandasyn jasaqtap, halyqty tolyq aqparattandyrýmen qatar, eki myńǵa jýyq tasqynnan zardap shekkenderdiń densaýlyǵyn tekserýdi maqsat etip qoıdy. Ol úshin aýyldyq ambýlatorlyq pýnktte turǵyndar kásibı jetekshi mamandarǵa tegin qaralyp, qajetti keńesterin alsa, arnaıy jabdyqtalǵan jyljymaly medısınalyq keshende de medısınalyq kómek kórsetilip, dıagnozy anyqtalǵan jaǵdaıda tegin qajetti dári-dármekpen tolyq kólemde qamtamasyz etildi.
– Tótenshe jaǵdaı oryn alǵan kezden bastap qalanyń medısınalyq qaýymdastyǵy aıaǵynan tik turyp qyzmet kórsetip jatyr, – dedi jýrnalısterge bergen suhbatynda Almaty qalalyq densaýlyq saqtaý basqarmasynyń basshysy Janat Qasymjanova. – Sý tasqyny kezinde 20 mobıldi jedel medısınalyq járdem brıgadalary kómekke kelip, oqıǵa bolǵan kúni olardyń arasynda 20 naýqas №7 qalalyq klınıkalyq aýrýhanaǵa jetkizildi. Olardyń densaýlyǵyna baılanysty jeteýi aýrýhanaǵa jatqyzyldy. Qazirgi kezde aýrýhanada 6 naýqas em qabyldap, qalǵandary densaýlyǵynyń jaqsarýyna baılanysty otbasyna oraldy. Eki aıaǵyna operasııa jasalǵan 1 naýqastyń da densaýlyǵy qalypty. Búginde aýdanda qurylǵan eki shtabtyń árqaısysynda kúndelikti bir brıgadadan kezekshilik etýde. Búgin Qazaqstan-Reseı ýnıversıtetimen birlese osyndaı aksııa uıymdastyryp jatyrmyz.
Ádette, tabıǵı apat bolǵan jerlerde dızenterııa, tumaý sııaqty juqpaly aýrýlardyń oshaǵy paıda bolýy múmkin. Búgin Almatyda ondaı kórinis baıqalmaıdy. Múmkindikti paıdalana otyryp, qalalyq farmasevtıka qaýymdastyǵyna alǵysymyzdy bildiremiz. 1 mln. teńgege gýmanıtarlyq kómek retinde eń qajetti degen dári-dármek berdi.
Sondaı-aq, qalanyń bas dárigeri qalanyń medısına qyzmetkerleri tasqynnan zardap shekken turǵyndarǵa materıaldyq kómek retinde bir kúndik jalaqysyn aýdarýda ekenin aıtty. Qazirgi tańda Densaýlyq saqtaý basqarmasyna qarasty 83 vedomstvolyq medısınalyq uıymnyń 40 mekemesiniń qyzmetkerleri «Jańa Alataý» qoǵamdyq uıymynyń esepshotyna 14,4 mln. teńge aýdarǵan, qalǵan mekemeler apta sońyna deıin osy bastamany qoldamaq kórinedi.
– Biz sýdyń tasyǵanyn túngi saǵat ekilerde bildik, – dedi ózin Qaraǵaıly aýylynyń turǵyny dep tanystyrǵan keıýana Balahanym Ahmetova. – Elden aınalaıyn, otbasymyzdy úıden shyǵýǵa járdemdesti. Úıimiz qulamaǵanmen, ishi, jertóle sýǵa toldy. Qorshaýyn, qora-qopsyny alyp ketti. Balamnyń aıaǵy syndy. Baǵymyzǵa shyǵar, bizdiń aýylymyz qalaǵa qosylyp, jaqyn jerden dárigerler, áskerı sarbazdar, kýrsanttar, aýyldastar – barlyǵy kómekterin kórsetti. Ákimderge de rızamyz. Bári járdem berdi. Dárigerler dızenfeksııa jasap, eki-úsh kún júrdi. Aýyldyń dárigerleri, tipti, jaǵdaıymyzdy bilip, úıden shyqpaıdy deýge bolady. Aýyldyń halqyna rahmet, qazaq, uıǵyr deısiz be, kúnde úsh mezgil tamaq berýde. Bizder 1944 jyly solaqaı saıasattyń qurbany bolyp, osy qasıetti jerge kelgenbiz. Qazaq halqyna rızamyz. Jastarǵa ómir bersin. Qazaqstanǵa tynyshtyq, jerdiń tamyryna myqtylyq bersin.
Al Qaraǵaılyda 1956 jyldan turatyn Svetlana Nasyrova jýrnalıster arqyly apat bolǵannan beri úlken kómek kórsetip jatqanyn Almaty qalasynyń ákimdigine shyn júrekten rızashylyǵyn bildirgisi keletinin jetkizdi. «Medıkterge erekshe rahmetimdi aıtqym keledi. Birinshi kúnnen kelip, aýlalardy tekserip, medısınalyq kómekterin kórsetip, tegin dári-dármekterin taratyp jatty. Al búgingi aksııada jetekshi mamandardyń kómegimen medısınalyq tekserýden óttik. О́z basym kardıologqa kórinip, keńes, tegin dári-dármek aldym», – dedi ol.
Naýryzbaı aýdany ákimdiginiń málimetinshe, 1531 adam turatyn 475 baspana, al Alataý aýdany ákimdiginiń habarlaýynsha, 497 adam turatyn 121 úı zaqymdanǵan. Tótenshe jaǵdaı oryn alǵan kezden bastap «Taýsamaly» dárigerlik ambýlatorııasy men №25 qalalyq emhana qyzmetkerlerinen medısınalyq brıgadalar jasaqtalǵan. Turǵyndardyń basym bóligi bas aýrýy, arterııalyq gıpertonııa, jedel respıratorlyq vırýstyq ınfeksııa sııaqty aýrý túrlerine shaǵymdanǵandyǵy anyqtalǵan.
Gúlzeınep SÁDIRQYZY,
«Egemen Qazaqstan».
Almaty oblysy.
