Benın syrtqy saıası vedomstvosy basshysynyń elimizge alǵashqy sapary ekijaqty qarym-qatynastar tarıhyndaǵy mańyzdy kezeń bolyp, eki el arasyndaǵy ózara is-qımylǵa jańa serpin berdi.
Kelissózder barysynda taraptar saıası, ekonomıkalyq jáne mádenı-gýmanıtarlyq salalardy qamtıtyn ózara is-qımyldyń negizgi baǵyttary boıynsha keń aýqymdy máselelerdi talqylady. Mınıstrler saýda, logıstıka jáne sıfrlandyrý sııaqty strategııalyq mańyzdy salalardaǵy yntymaqtastyqty keńeıtýge erekshe nazar aýdardy. Osy turǵyda sharttyq-quqyqtyq bazany jetildirýge jáne ártúrli deńgeılerde saparlarmen almasýdy jandandyrýǵa daıyndyqtaryn rastady.
– Jańa geosaıası jaǵdaıda Qazaqstan Afrıka qurlyǵymen ekonomıkalyq saıasatynda teń quqyqty jáne ózara tıimdi seriktestikti basty orynǵa qoıady. Biz aýyl sharýashylyǵy, kólik jáne logıstıka, qarjy, sıfrlandyrý jáne telekommýnıkasııalyq tehnologııalar sııaqty perspektıvaly baǵyttarda Benınmen yntymaqtastyqty damytýǵa múddelimiz, – dep atap ótti M.Nurtileý.
О́z kezeginde Benın SIM basshysy elimizdiń óz ishimizdegi jáne halyqaralyq arenadaǵy jetistikterine tańdanysyn bildirdi.
– Qazaqstannyń tabystary – Prezıdent Qasym-Jomart Toqaevtyń jeke úlesi men Úkimettiń tıimdi jumysynyń nátıjesi. Elderimiz ortaq qundylyqtardy bólisedi, dál osy negizde biz berik, serpindi jáne nátıjeli qarym-qatynastar ornatýǵa umtylamyz, – dedi ol.
О́tken jyldyń qorytyndysyna kóz júgirtsek, Qazaqstan men Afrıka arasyndaǵy taýar aınalymy 700 mln dollardan asty jáne baılanystardy odan ári nyǵaıtý maqsatynda qazaq tarapy Benınge saýda mıssııasyn jiberýge daıyndyǵyn jetkizdi.
Aýyl sharýashylyǵy ónimderiniń eksporty aıasynda Benınge astyq, un, ósimdik maılary, tyńaıtqyshtar jáne organıkalyq ónimderdi jetkizý perspektıvalary qarastyryldy. Sondaı-aq taraptar Benındegi aýyl sharýashylyǵy men geologııalyq barlaý qajettilikteri úshin paıdaly bolýy múmkin jer sharyn qashyqtyqtan zondtaý boıynsha otandyq spýtnıktik qyzmetterdi paıdalaný múmkindigin talqylady.
Sonymen qatar kezdesýde kólik baılanysyn damytý máselesine de erekshe nazar aýdaryldy. Elimiz Qytaıdan Eýropaǵa jerústi tranzıtiniń 90%-yn qamtamasyz etedi, al Benın Kotoný porty arqyly Batys jáne Ortalyq Afrıkaǵa qaqpa retinde mańyzdy ról atqarady. Osyǵan baılanysty taraptar «Bir beldeý, bir jol» bastamasy jáne Orta dáliz aıasynda yntymaqtastyqty damytý, eki eldiń kólik vedomstvolary men logıstıkalyq kompanııalary arasynda kelissózder júrgizý qajettigin atap ótti.
Aqparattyq tehnologııalar men sıfrlandyrý salasyndaǵy joǵary áleýet atalyp ótti. Benınmen sıfrlyq yntymaqtastyq boıynsha Jol kartasyn qabyldaýǵa daıyndyq rastaldy, sondaı-aq benındik kompanııalar Ortalyq Azııadaǵy eń iri IT-startap tehnoparki – «Astana Hub» jumysyna qosylýǵa shaqyryldy.
Sonymen qatar taraptar azyq-túlik qaýipsizdigi konteksindegi Islam yntymaqtastyǵy uıymy aıasyndaǵy yntymaqtastyqty talqylady. Qazaqstan Benınniń Azyq-túlik qaýipsizdigi jónindegi Islam uıymyna qyzyǵýshylyq tanytqany úshin alǵys bildirip, onyń Jarǵysyn jaqyn arada ratıfıkasııadan ótkizetinine úmitin jetkizdi.
Elimizdiń SIM basshysy Almatyda Ortalyq Azııa men Aýǵanstan úshin BUU-nyń Ornyqty damý maqsattary jónindegi óńirlik ortalyǵyn qurý týraly el bastamasyn qoldaǵany úshin Benın tarapynyń ustanymyna rızashylyǵyn bildirdi.
Kezdesý qorytyndysy boıynsha ekijaqty yntymaqtastyqty odan ári nyǵaıtý maqsatynda elimiz ben Benın syrtqy saıası vedomstvolary arasynda Saıası jáne dıplomatııalyq konsýltasııalar boıynsha ózara túsinistik týraly memorandýmǵa qol qoıyldy.
