Sýretti túsirgen – Erlan OMAR, «EQ»
– Siz munda jańylysyp kirip ketken joqsyz ba? – dedim báseń únmen.
– Joq, biz munda jylynyp alý úshin kirgenbiz, – dedi ol. Odan ári jaýaptaspadyq.
Bul kisiniń álgi sózin minberde turǵan ımam estigen joq, árıne. Biraq Qudaıdyń qudiretine shek bar ma? Álgi kúbirlegen kisiniń «o dúnıeni kórip kelgendeı sóıleıdi...» degen jazǵyrý sózin estip, soǵan ádeıige ýáj aıtqandaı bolǵan ımam oraǵyta kelip, o dúnıeniń bar ekenin rastaıtyn Qurannan, hadısterden dálelder keltirip, bul turǵyda Muhammedtiń (s.ǵ.s.) qasıet tunǵan ósıetterin qozǵady.
Imamnyń sózinen ne uqqany belgisiz álgi eki kisi ýaǵyz bitpeı syrtqa shyǵyp ketti. Men ýaǵyzdan keıin namazymdy oqydym da úıge qaıtýǵa aıaldamaǵa keldim. Jańaǵy ekeý de osynda eken. Olardyń biri – jastaýy maǵan taqap kelip:
– Aıtyńyzshy, jańaǵy ımamnyń sózine senesiz be? – dedi.
– Senbegende, Qurannan, hadısterden dálel keltirip tur ǵoı.
– O dúnıe bar ma?
– Bar.
– Kim kórip kelipti, aıtyńyzshy.
– Eshkim kórip kelmese de, o dúnıeniń bar ekeni adamzatqa Quran arqyly anyq eskertilgen. Osy eskertpege júreginde ımany bar adam moıynsunyp, o dúnıeniń bar ekenine senýge tıis. Áıtpese, meıirimdi Qudaıǵa senbegen, Quranǵa kúmán keltirgen bolamyz.
– O dúnıeniń bar ne joq ekenin adamzattan jasyryp qoıǵan sizdiń Qudaıyńyz qaıdan meıirimdi bolsyn, ol qatigez. Qudaı jaqsy bolsa, bárin ashyp kórsetpeı me myna jurtqa. qudaıshylyn, munyń báriniń.
Sol kezde álginiń janyndaǵy kisi serigine qarap:
– Soryń qurǵyr-aý, baqıdyń bar ne joq ekeni adamzatqa anyq belgili bolsa, mynaý ómir qasiretke aınalmaı ma? Tirshilikte ne mán qalady? Kórsoqyrsyń. Oılansańshy tereńirek. O dúnıeniń bar ekenin sózben eskertip, biraq ony is júzinde kózden, sanadan jasyryp qoıýynda Qudaıdyń teńdessiz meıirimdiligi jatqan joq pa? O dúnıeniń baryna ne joǵyna senýdi Qudaı adamnyń sanasynyń talqysyna qaldyrýy netken ulylyq. Osy talqy-synaqtan súrinbeı ótý mańdaıyna jazylǵan pendeden artyq baqytty kim bolmaq? – dedi.
Men odan mundaı oı kútken joq edim. Oǵan tańyrqaı qaradym. Júzi nurlanyp turdy.
Men avtobýsqa minip bara jatyp kórdim, Qudaıdy qatigez degen jigit serigine qolyn bir siltedi de, óz betimen ketip bara jatty...
