Aıqastyń taǵdyry Aberdınde sheshiledi

Burnaǵy kúni Eýropa lıgasy irikteý týrnıriniń úshinshi raýndynda «Qaırat» Shotlandııanyń «Aberdın» komandasyn jeńdi. Almatyda bolǵan oıyn 2:1 esebimen alań ıeleriniń paıdasyna sheshildi. Kezdesýdi qaırattyqtar óte belsendi bas­tady. Birden alǵa umtylǵan olar 13-mınýtta esep ashyp úlgerdi. Mergendigimen alǵash kózge túsken Mıhaıl Bakaev. Arada 9 mınýt ýaqyt ótkende komanda kapıtany Baýyrjan Islamhan esepti 2:0-ge jetkizdi. Onyń 40 metr jerden jasaǵan joıqyn soqqysyna «Aberdın» qaqpashysy Dennı Ýord tosqaýyl bola almady. Jalpy, oıyn barysyndaǵy Baýyrjannyń belsendiligin erekshe aıtyp ótken jón. Ekinshi taımda qonaqtardyń basym bolǵanyn moıyndaýymyz kerek. Tipti úzilisten keıin alańǵa múldem basqa komanda shyqqandaı áser qaldyrdy. Soǵan baılanysty Vladımır Vaısstyń shákirtteri qorǵanysta kóp kúsh jumsaýǵa májbúr boldy. Matchtyń 69-mınýtynda shotlandtar aqyry degenderine jetip, esep aıyrmasyn qysqartty. Goldyń avtory – Kennı Maklın. О́z qaqpalaryna dop kirgizip alǵannan keıin ǵana alań ıeleri jınaqylyq tanytyp, birneshe júıeli shabýyl uıymdastyryp kórdi. Alaıda, oıyn sońyna deıin tablodaǵy esep ózgergen joq. Qos komanda arasyndaǵy qarymta kezdesý 6 tamyzda Shotlandııanyń Aberdın qalasynda ótedi. Sonyń nátıjesi boıynsha irikteý týrnıriniń pleı-off básekesine shyǵatyn jasaq anyqtalady. Aıta keteıik, osy jeńisinen keıin «Qaırat» ÝEFA-nyń klýbtyq reıtınginde 4 satyǵa joǵary jyljyp, 303-orynǵa turaqtady. Búginde komandanyń enshisinde 3,725 upaı bar. Buǵan deıin almatylyqtar týrnırdiń birinshi jáne ekinshi raýndtarynda tıisinshe Serbııanyń «Srvena Zvezdasy» men Armenııanyń «Alashkert» komandalaryn joldan shyǵaryp tastaǵan edi. Elaman QOŃYR, «Egemen Qazaqstan».