Naqty mindetter júkteldi

Keshe Elbasy Nursultan Nazarbaevtyń tóraǵalyǵymen Úkimettiń keńeıtilgen otyrysy ótti. «Bárińizge belgili, 26 sáýir kúni búkilhalyqtyq saılaý ótip, onda halyq óziniń aýyzbirshiligin dúnıejúzine pash etti. Meni biraýyzdan saılady. Sonymen qosa, ekinshi jaǵynan, saıası-ekonomıkalyq jolymyzdy maquldap, saılaýaldy baǵdarlamamyzdy qoldady. Halyq bizge sol joldy ári qaraı jalǵastyrýǵa senim bildirdi. Aldaǵy ýaqytta memleket aldynda turǵan másele – ol jarııalanǵan baǵdarlamalardy, ásirese, 5 halyqtyq baǵdarlamany oryndaý. Solardy qalaı oryndaýymyz, ne isteýimiz kerek? Halyqtyń belsendiligin arttyryp, jańǵyrtýǵa negizdelgen baǵdarlamany qalaı atqaramyz? Mine, búgingi jıyn osyǵan arnalyp otyr»,– dep bastady óz sózin Prezıdent. Memleket basshysy bul oraıda, ortaq jeńisti odan ári eseleý úshin, eń aldymen eldiń belsendiligi kerek ekenin atap kórsetti. «Ortaq jeńisimizdi ári qaraı jetistikke ulastyrý úshin aýqymdy jumys kútip tur», – dedi Elbasy. Sonymen qatar, Elbasy Úkimet quramy jańa taǵaıyndalǵanyn eske salyp, olardyń jumysyna tabys tiledi. Máselen, bul oraıda Prezıdent: «Senim kórsetildi. Ári qaraı jumys isteýge barlyq jaǵdaılar bar. Osynyń bárin aqtaýǵa tıissizder. Qolǵa alǵan reformalarǵa sáıkes, ulttyq komıssııa quryldy. Men búgin osy komıssııanyń erejesin bekittim. Komıssııanyń árbir baǵytyna, ár salaǵa jumys toby qurylyp, basshylary taǵaıyndaldy. Ne isteý kerektigine qatysty basty máseleler de belgilendi. Endi ári qaraı jumys isteý kerek. Sebebi, saılaýdan keıingi atqarylatyn jumystar «Qazaqstan-2050» baǵdarlamasyn jáne 30 damyǵan eldiń qataryna kirýge qatysty strategııalyq baǵytymyzdy júzege asyrýǵa baǵyttalatyn bolady», – dedi N. Nazarbaev. Sonymen, bul kúngi otyrys barysynda Memleket basshysy usynǵan 5 ınstıtýttyq reformany júzege asyrý baǵytyndaǵy 100 naqty qadam­nyń praktıkalyq jaıttary qaras­ty­ryldy. Atalǵan reformalardyń árqaısysy boıynsha Memleket basshysy birqatar naqty mindetter belgiledi. Atap aıtqanda, Nursultan Nazarbaev Memlekettik qyzmet isteri jáne sybaılas jemqorlyqqa qarsy is-qımyl agenttigi búkil memlekettik qyzmetke kadr irikteýdi júrgizetin biryńǵaı rekrýtıngtik ortalyq bolýy tıistigine toqtalyp ótti. Sondaı-aq, Qazaqstan Prezıdenti jergilikti qoǵamdastyq aldynda esep beretin jergilikti polısııa qyzmetin qurý qajettigin de atap ótti. «Ol qoǵamdyq tártipti saqtaýǵa, turmystyq qylmysqa qarsy is-qımyl men jol-patrýldik qyzmet jumysyna jaýapty bolady. Naq osy qyzmet jergilikti qoǵamdastyqpen tyǵyz yntymaqtasa otyryp usaq zań buzýshylyqtarǵa qatysty «múlde tózbeý» rejimin qamtamasyz etýi tıis», – dedi Nursultan Nazarbaev. Memleket basshysy sonymen qatar, aýyl sharýashylyǵyna arnalǵan jerlerdi jekeshelendirý, salyq júıesin reformalaý, elektr energetıkasy salasyndaǵy saıasatty qaıta qaraý, qurylys salasyna ózgerister engizý, ındýstrııalandyrý baǵdarlamasyn ári qaraı júzege asyrý, sondaı-aq kedendik rásimder men Eýrazııalyq ekonomıkalyq odaq aıasyndaǵy saýda saıasatyn jetildirý isin bastaýdyń mańyzdylyǵyna toqtaldy. Nursultan Nazarbaev Qazaqstan ha­lyq­aralyq kólik-kommýnıkasııalyq arnalarmen ıntegrasııalanǵany jón ekenin aıtty. «Mýltımodaldi, joǵary jyldamdyqty «Eýrazııalyq transqurlyqtyq dáliz» qury­lýy tıis. Ol áýe, teńiz, temirjol jáne avto­kólik qatynastaryn toǵystyrady. Eý­r­a­zııalyq dáliz eki baǵyt boıynsha ótedi. Birin­shisi – Qazaqstan, Reseı aýmaǵy arqyly Eýro­paǵa shyǵady. Ekinshisi – Qazaqstan aýma­ǵy arqyly Qorǵastan Aqtaý portyna deıin, odan ári Kaspıı teńizi men Kavkaz arqy­ly Eýropaǵa jáne Iran men Parsy shyǵa­naǵy arqyly ońtústikke jalǵasady. Joba aıasynda Qazaqstannyń búkil aýmaǵy ar­qy­ly Aqtaý portyna deıin jańa temirjol je­lisin salý qajet», – dedi Memleket basshysy. Budan bólek, Qazaqstan Prezıdenti ult­tyq qundylyqtardy jáne óskeleń urpaq sanasyndaǵy patrıotızmdi nyǵaıtýdyń mańyz­dylyǵyn atap ótti. «Úlken el – Úlken otba­sy» jobasyn iske qosý qajet. Onyń aıasyn­da kınofılmder, serıaldar jáne el tarı­hy, qazaqstandyq mádenıet, eldiń búgingi ómiri týraly habarlar túsiriletin bolady. Týrıstik baǵdarlar men etnoaýyl­dar uıymdastyrylady. Mádenı ınfraqurylym bar­lyq qazaqstandyqtar úshin qoljetimdige aı­­nalady. Máńgilik El qundylyqtaryn mektep stan­darttaryna qalaı engizý kerektigin oılas­tyrý kerek», – dedi Nursultan Nazar­baev. Memleket basshysy Úkimet aldyna 5-6 negizgi ındıkator qoıylatynyn aıtty. «Ol óz kezeginde árbir mınıstr men ákim úshin 2-3 naqty kórsetkishti belgilep beretin bolady. Baqylaý tek maqsatty ındıkatorǵa qol jetkizý negizinde júzege asyrylady. Aralyq baqylaý men artyq tapsyrmalardy joıyp, memlekettik organdarǵa kóbirek erkindik berý qajet. Olar ózderiniń jumysynda óz betimen áreket ete alatyndaı, biraq jaýapty ári esep berip otyratyndaı bola túsedi», – dedi Qazaqstan Prezıdenti. Nursultan Nazarbaev memlekettik organdar men ákimdikter janyndaǵy qoǵamdyq keńesterdiń rólin kúsheıtý qajettigin aıtty. «Olar mindetti túrde aýmaqty damytýǵa arnalǵan strategııalyq josparlar men baǵdarlamalardyń oryndalýyn talqylaýǵa qatysady; jergilikti jerlerde bıýdjettiń, azamattar quqyqtary men bostandyqtaryna qatysty normatıvtik-quqyqtyq aktiler jobalarynyń, baǵdarlamalyq qujattar jobalarynyń aıqyndalýyna atsalysady», – dedi Memleket basshysy. Qazaqstan Prezıdenti otyrys barysynda memlekettik qyzmetterdiń biryńǵaı provaıderi bolatyn «Úkimet azamattar úshin» memlekettik korporasııasyn qurý múmkindigin qarastyrýdy da usyndy. Úkimettiń keńeıtilgen otyrysynyń sońynda Memleket basshysy barlyq qolǵa alǵan jumystardy qysqa merzim ishinde atqarý kerektigin atap ótti. «Tereń bilimdi, halyqaralyq tájirıbeni zertteýdi qajet etetin aýqymdy jumys kútip tur. Onyń oryndalýy elimizdi jańa deńgeıge kóterýge múmkindik týǵyzady. Bizden halyq budan ári qadam jasaýymyzdy kútip otyr. Ol úshin árqaısyńyzdyń qajetti bilimderińiz, tájirıbelerińiz ben biliktilikterińiz bar. О́zderińizge artylǵan úmitti aqtaý kerek», – dedi Nursultan Nazarbaev. Otyrys barysynda Premer-Mı­nıstr K.Másimov sóz sóılep, burynǵy múshe­leriniń qaıta taǵaıyndalýy Úkimetke bar­lyq tapsyrmalardy oryndaýǵa jedel kirisý­ge múmkindik beretinin aıtty. «Sizdiń tapsyr­mańyzǵa sáıkes, barlyq mınıstrlikter men vedomstvolarǵa belgilengen mindetterdi, ulyqtaý rásiminde sóılegen sózińizdi, qabyl­danǵan baǵdarlamalardy jáne beril­gen nusqaýlaryńyzdy eskere otyryp, taıaý úsh aıǵa arnalǵan is-qımyl baǵdarla­masyn ázirleý jóninde tapsyrma beril­di. Belgilengen merzimge, ıaǵnı maýsym­nyń aıaǵyna deıin Sizdiń qaraýyńyzǵa reformalardy jalǵastyrý jáne tapsyrmalaryńyzdyń oryndalýy jónindegi usynystardy engizemiz», – dedi Premer-Mınıstr. Otyrys aıasynda úkimet músheleri, mem­lekettik organdar men ulttyq kom­pa­nııa­lardyń basshylary 5 ınstıtýttyq reformany júzege asyrýǵa baılanysty máseleler jónindegi pikirlerin ortaǵa saldy. Láıla EDILQYZY, «Egemen Qazaqstan».