Aýyldastary Saıyn Boranqulov pen Bátıma Maıasarovanyń otbasyn yntymaǵyna yrysy, birligine berekesi saı shańyraq retinde qurmetteıdi, qadir tutady. Otaǵasy eńbek jolyn 1966 jyly traktorshy-mehanızatorlyqtan bastady. Keıin etiniń tiriligi, eńbekqorlyǵy men ómirlik ustanymy arqasynda keńshar komsomol komıtetiniń hatshysy, zootehnık, ferma meńgerýshisi, sharýashylyq dırektorynyń orynbasary, ekonomıst boldy. Qaı qyzmette bolmasyn iskerlik qabiletimen, yjdaǵattylyǵymen tanylǵan ol 2002 jyldan bastap «Temirlan» sharýa qojalyǵyn ashyp, basqaryp keledi.
Joldasy Bátıma bolsa, 2009 jylǵa deıin kitaphana meńgerýshisi qyzmetin atqaryp, zeınetkerlikke shyqty. Qazir «Álı» dúkenin ashyp, halyqqa saýda qyzmetin kórsetip otyr. 5 bala, 11 nemere tárbıelep otyrǵan otbasy elge syıly, halqyna qadirli.
Saıyn Boranqululy men Batıma Dúısenbaıqyzynyń otbasyn qurǵanyna 45 jyl bolǵan eken. Júrek qalaýymen qosylyp, izgi tilekterimen ilgerige qadam basqan erli-zaıyptylar shańyraqtyń shyraıyn keltirip, keleshegin kemel etýge judyryqtaı jumyldy, jarasty otbasy bolýdyń úlken mektebinen ótti. Olar – joǵary bilimdi mamandar, aýyldyń kórkeıýine bir kisideı úles qosqan jandar. Bul otbasyn ózderi týyp-ósken Altyqarasý okrýgindegi Eńbekshi aýylynyń naǵyz patrıottary deý oryndy. Egin ósirýmen, mal sharýashylyǵymen aınalysqan olar ónegeli otbasyn qalyptastyra otyryp, ata kásiptiń ajaryn keltirdi, eńbektiń kórigin qyzdyrdy. Erte turdy, kesh jatty, erinbedi, erteńgi kúngi ajarly tirliktiń adal eńbekpen, mańdaı termen keletinin ózderi de túsindi, óz ónegeleri arqyly oǵan balalaryn da tárbıeledi.
Bul otbasynyń sharýashylyqtardyń ajary taıyp, el jappaı jan-jaqqa kóship jatqan kúrdeli jyldary Eńbekshi eldi mekeniniń ydyramaı saqtalyp qalýyna, on bir jyldyq mekteptiń jabylmaýyna muryndyq bolǵanynyń ózi nege turady. Osyndaı ıgi isterdiń nátjesinde aýyldyń tutastyq tuǵyry bekip, áleýmettik nysandardyń ustaǵannyń qolynda, tistegenniń aýzynda ketpeı saqtalyp qalǵanyn halyq biledi. Osyndaǵy mádenıet úıin, kitaphana, balabaqshany qaıta qalpyna keltirip, bilim berý mekemeleriniń kúrdeli jóndeýine qarjylaı qoldaý kórsetýden de eshqashan tartynǵan emes. Aýyldaǵy joq-jitik, turmysy aýyr otbasylaryn da óz qamqorlyǵyna alyp keledi. Osy Eńbekshide qazir 101 otbasy turady. Saıyn Boranqulov solardyń basym kópshiligine jumys taýyp berip, mal, qus ósirýge kómegin tıgizip otyr. Qazir eldiń turmysy túzeldi, jaǵdaıy jaqsardy.
Búgingi tańda ol sharýa qojalyǵynda 205 iri qara, 810 qoı, 35 jylqy ósirip otyr. Mal basyn óz tólinen ósirýde jyl saıyn tabysqa jetip keledi. Qazirgi tańdaǵy jańashyl ádisterdi qoldana otyryp, asyl tuqymdy mal basyn kóbeıtýde. «Sybaǵa» aýyl sharýashylyǵyn qoldaý qory arqyly beriletin nesıeni paıdalanyp, sharýashylyǵyn keńeıtýde. Eńbeginiń nátıjesinde birneshe ret aýdandyq, oblystyq, respýblıkalyq deńgeılerdegi marapattarǵa ıe boldy.
«Balapan uıada ne kórse, ushqan
da sony iledi» degendeı, balalarynyń barlyǵy joǵary bilimdi, ata-ana jolyn qýǵan, kásipkerlikterin jalǵastyrýda. Nemereleri – oqý ozattary, sport, óner, bilim saıystarynyń jeńimpazdary. Saıyn Boranqulov pen Bátıma Maıasarovanyń otbasy ómirlik qundylyqtardy jańǵyrtý jáne otbasy ónegesin nasıhattaý maqsatynda ótkizilip kele jatqan «Mereıli otbasy» ulttyq baıqaýynyń oblystyq kezeńine qatysyp, ekinshi oryndy jeńip aldy. Munyń ózi ónegeli otbasyna berilgen laıyqty baǵa boldy. Oǵan bul shańyraqtaǵy baqýatty turmys pen baqytty tirlik negiz qalap otyrǵany sózsiz.
Satybaldy SÁÝIRBAI,
«Egemen Qazaqstan».
Aqtóbe oblysy,
Temir aýdany.
