Fransııa azamaty Abdýllah Sekımı – birneshe tildi erkin meńgergen jan-jaqty tulǵa. Ulty arab bolsa da, ol fransýz, aǵylshyn, ıspan, arab jáne qazaq tilderinde erkin sóıleı alady. Qazaq tiline degen qyzyǵýshylyǵynyń arqasynda ol 2022 jyly Fransııadan Qazaqstanǵa kóship kelip, búginde Astanada turyp jatyr.
Abdýllahtyń qazaq tilin meńgerýine sport, naqtyraq aıtqanda dzıýdo sebep bolǵan. Qazaq dzıýdoshysy Eldos Smetovke tánti bolǵan ol, sportshy jaıly aqparatty qazaq tilinde izdeý kezinde bul tildi úırenýge sheshim qabyldaǵan.
«Eldos Smetovtiń barlyq jekpe-jegin YouTube arqyly qarap, onyń Qazaqstan azamaty ekenin bildim. Osydan keıin el týraly kóbirek aqparat izdeı bastadym. Qazaq tiliniń kórkemdigin alǵash ret «Jaýjúrek myń bala», «Tomırıs», «Uly dala zary» fılmderin kórgende sezindim. Bul tildiń áýezdiligi meni baýrap aldy» deıdi ol.
Abdýllah qazaq tilin segiz aıda úırenip shyqqan. Bul jolda oǵan kóptegen adamdar qoldaý kórsetip, motıvasııa berip otyrǵan. Bastapqyda til úırený qıynǵa soqqan, sebebi oqý quraldarynyń basym bóligi orys tilinde bolǵan jáne qazaqsha sapaly kontenttiń tapshylyǵy baıqalǵan.
Tildi meńgerýdiń basty tásili – tyńdaý, sóılesý jáne sózdik qordy arttyrý dep sanaıdy. Qazirgi tańda ol qazaq, aǵylshyn, fransýz, arab tilderinen sheteldikterge sabaq beredi. Onyń shákirtteri arasynda ártúrli eldiń ókilderi bar.
Abdýllah óz sózinde Qazaqstanda turatyn ózge etnos ókilderiniń ózara birligi jarasqan, tatý ekenin atap ótti.
«Qazaqstanda turatyn fransýz azamaty retinde men el ishindegi etnosaralyq tatýlyq pen birlikti saqtaýdyń mańyzyn joǵary baǵalaımyn. Qazaq tilin úırený arqyly men osy halyqtyń mádenıeti men rýhyn jaqsyraq túsine bastadym», deıdi Abdýllah.
Abdýllah etnosaralyq qatynastardyń jaqsy ekenin atap ótse de, ózge ult ókilderiniń qazaqsha emes, kóbine oryssha sóılesýine tańdanysyn bildirdi.
«Fransııada turatyn bolsańyz, fransýz tilinde sóıleýge mindettisiz. Al Qazaqstanda nege oryssha? Bul – qazaq halqynyń keńpeıildiligi men meıirimdiliginiń kórinisi. Biraq árbir azamat qazaq tilin meńgerýge umtylýy kerek. Qazaq tilin bilý – osy elge degen qurmettiń belgisi», deıdi ol.
Abdýllah qazaq tilin meńgerý arqyly kóptegen esikterdiń ashylǵanyn aıtty.
«Qazaqstanda óz kásibimdi ashtym. Jýrnalıster suhbat alady, podkastqa shaqyrady. Sondaı-aq fransýzsha bilgim keledi, oqyǵym keledi degen ótinishpen keletin adamdar óte kóp. Qazaq tilin bilgenimniń arqasynda kóptegen tanymal saıasatkarlermen sportshylarmen kezdesip, tanystym. Jalpy, qazaq tilin bilýdiń men úshin jaǵymdy yqpaly kóp boldy», deıdi keıipkerimiz.
Abdýllah Qazaqstan halqyn erekshe jaqsy kóretinin aıtyp, munda qalýǵa nıetti ekenin bildirdi. Qazaqtardyń qonaqjaılylyǵy men rýhanı jaqyndyǵy ony baýrap alǵan. Ol bolashaqta musylman otbasyn qurýdy josparlap otyr jáne qazaq kontentin damytý baǵytynda jobalarmen aınalysýdy kózdeıdi.
