Qyzylorda kórkeıe bermek

Qyzylorda qalasyn kórkeıtýge qatysty kóptegen shara qolǵa alyndy. Ortalyq kósheler jóndelip, jaryq baǵanalary aýystyrylyp, aıaldamalar jańartylyp, jaıaý júrginshiler joly salynyp jatyr. Aldaǵy ýaqytta da Aqmeshittiń ajaryn arttyrýǵa qatysty kóptegen sharýa qolǵa alynbaq. Mysaly, «Araı» shaǵyn aýdanynan jańa turǵyn úı kesheni boı kótermek. Sáýlet-qala qurylysy keńesiniń otyrysynda «Jetý» JK merdiger kompanııasynyń basshysy Álaıdar Syzdyqov turǵyn úı kesheni jobasymen tanystyrdy. «Araıdaǵy» Ábdimomynov kó­shesinen salynatyn bul keshen­de 3 qabatty 12 jáne 18 páter­li 2 úı, 2 qabatty tanhaýstan turmaq. Sondaı-aq, kottedj úı­ler de boı kótermek. Balalarǵa arnalǵan oıyn, sport alańdary da qarastyrylǵan. Merdiger jobany óz qarajaty esebinen júzege asyrmaqshy. Qurylys jumysy tolyǵymen 2016 jyly aıaqtalatyn bolady. Keńes otyrysynda turǵyn úı ke­sheniniń eskızdik jobasy maquldandy. Oblys ákimi Qyrymbek Kósherbaev nysan­dy sapaly ári ýaqtyly aıaq­taýdy tapsyrdy. Salynatyn qurylys nysandarynyń barlyǵy tehnıkalyq ta­lapqa saı jáne qalanyń sáýletine ke­ri áserin tıgizbeýi kerektigin eskertti. Sonymen qatar, Qyzylordada zamanaýı saýda oıyn-saýyq kesheni salynady. Saýda oıyn-saýyq keshenin «Qurylys-kólik kompanııasy» JShS qarjysy esebinen Sultan Beıbarys kóshesinde salý josparlanýda. Bul joba úshin 8 gektarǵa jýyq jer bólindi. Joba boıynsha saýda oı­yn-saýyq kesheni tolyqtaı ın­jenerlik ınfraqurylymmen qamtamasyz etilip, onyń aýmaǵy abattandyrylady. Oıyn-saýyq ortalyǵynda «Ramstor» saýda jelisi, kınoteatr, «Bebılon» balalar oıyn ortalyǵy, meıramhana, kıim dúkenderi, áýe, temirjol jáne týrıstik agenttikterdiń keńseleri sııaqty qyzmet kórsetý oryndary bolady. Sonymen qatar, 300 avtokólikke arnalǵan ashyq avtoturaq ta salynbaq. Merdiger jobany júzege asyrý úshin ekinshi deńgeıli bankter­den 3 mıllıard teńgege jýyq qarajatty nesıege alýdy kózdeıdi. Qurylys kezinde 300 adam, qurylys bit­ken soń turaqty 150 adam, 30 múmkindigi shekteýli jan jumys­pen qamtylmaq. Aımaq basshysy jańa ǵımarattyń aınalasyn kógal­dandyrý jáne kórkeıtý jumys­t­arynda tamshylatyp sýarý ádisin paıdalaný qajettigin aıtty. Erjan BAITILES, «Egemen Qazaqstan». QYZYLORDA.