Uly Otan soǵysyndaǵy Jeńistiń 70 jyldyq merekesine sanaýly kúnder ǵana qaldy. Qostanaı oblysynda Jeńis merekesin bıyl qarsy alatyn soǵys ardagerleri úsh júzden sál ǵana asady. Mereke qarsańynda oblys ákimi Nuraly Sádýaqasov oblystaǵy birqatar soǵys jáne tyl ardagerlerine memlekettik nagradalar tapsyrdy.
– Uly Otan soǵysynda ot pen oqqa keýdesin tosqan atalarymyz erliginiń arqasynda búgingi urpaqtary osyndaı beıbit kúnge jetip otyr. Tyldaǵy eńbek te aýyr boldy, analarymyz jankeshti eńbegimen er azamattardy joqtatpaı, sharýashylyqtardy júrgizdi, maıdanǵa kómek berdi, balalardy asyrady. Búgingi urpaq mundaı erlikti máńgi umytpaýy tıis, – dedi oblys ákimi Nuraly Sádýaqasov kezdesýde. Munan keıin ol soǵys ardagerleri Moldaǵalı Júnisbekovtiń, Nıkolaı Lıýlıýktiń, tyl ardageri Maǵaýııa Júnisovtiń keýdesine «Qurmet» ordenin taqty. Soǵys ardagerleri Aleksandra Efanova, Iаkov Qarataev, Muǵadar Serkebaev «Eren eńbegi úshin» medalimen, soǵys ardagerleri Saıyn Imanbaev, Alekseı Komlık, Semen Iаkovlev Qazaqstan Respýblıkasynyń Qurmet gramotasymen marapattaldy. Birqatar soǵys jáne tyl ardagerleri «1941-1945 jyldarǵy Uly Otan soǵysyndaǵy Jeńiske – 70 jyl» merekelik medaline ıe boldy.
– Men 1939 jyly Qyzyl Armııa qatarynda qyzmet etýge ketken edim. Ol kezde fın soǵysy bastaldy da, soǵan qatystyq. Endi bosanyp, elge qaıtamyz ba degende Uly Otan soǵysy bastaldy. Soǵystyń barlyq aýyrtpalyǵyn bastan keshtik. Týǵan elime 7 jyldan asqanda bir-aq oraldym. Ondaı soǵysty endi meniń urpaqtarym kórmesin. Táýelsiz elimniń nagradasyn keýdeme taǵyp turmyn, zamanym tynysh, búginge jetken ardagerlerdiń baqyty ǵoı bul. Táýbe! – deıdi soǵys ardageri 98 jastaǵy Moldaǵalı Júnisbekov ataı.
Uly Otan soǵysy jyldary berik tyl bolmaǵanda fashızmdi aýyzdyqtaý ońaı bolmas edi degen pikirdi tarıhshylar jıi aıtady.
– Odan beri kóp ýaqyt ótip ketse de, qıyndyǵy áli kóz aldymda. Beınetti jastyqpen ǵana kóterdik. Kóktemde bıdaı septik. Ormanda aǵash kestik. Mal da baqtyq. Kúndiz jumystan tıtyqtap sharshap kelip, úıge kelgen soń jún tútip, ıirip, shulyq toqyp, maıdanǵa jiberetin edik, – deıdi Kábıra Qolbaeva ájeı.
70 jyl az ýaqyt emes. Qarttyqqa amalsyz moıynsunǵan ardagerlerdi memlekettik nagradalaryn alýǵa balalary, nemereleri jetektep keldi. Oblystyq ardagerler keńesiniń tóraǵasy Kenjebek Ýkın ardagerlerdi nagradalarymen quttyqtap turyp:
– Sizderdi ýaqyt quryshtan quıǵan! Sizder otanymyz sanalǵan Keńester odaǵyn ǵana emes, búkil Eýropany fashızmnen azat ettińizder. Al fashızmniń ne ekenin biz búgin de sezinip otyrmyz. Sizderdegi maıdandas dostyqtan, rýh bıiktiginen keıingi urpaq tek qana úırenedi, – dedi Kenjebek Úkiuly.
Beıbit kúnniń tábárigindeı ardagerlerdiń aramyzda júrgeniniń ózi ádemi sýret, jarasym tárizdi.
Názıra JÁRIMBETOVA
«Egemen Qazaqstan».
QOSTANAI.
