Kitaphana kitappen tolyqty

Qyzylordadaǵy Ábilda Tájibaev atyndaǵy oblystyq ámbebap ǵylymı kitaphanasy 23 sáýir – Búkilálemdik kitap jáne avtorlyq quqyq kúni merekesine oraı «Taǵylymdy tartý – kitaphanaǵa kitap syılaý» aksııasyn uıymdastyrdy. Aksııanyń negizgi maqsaty – jastardyń týǵan jerge degen súıispenshiligin arttyryp, birlikke shaqyryp, qurmet pen jasampazdyq rýhyndaǵy patrıottyq tárbıege baýlý. Sonymen qatar, kitap oqýǵa degen qyzyǵýshylyǵyn arttyryp, urpaqtar sabaqtastyǵyn jalǵastyrý. Sonaý HIH ǵasyrdan beri ǵulamalar murasyn ǵasyrdan-ǵasyrǵa deıin saqtap, talaı oqyrman úshin bilim ordasy bolǵan kıeli shańyraq, búginde jańa zaman talaptaryna saı qyzmet kórsetýde. Búgingi kitaphananyń muraty qala jurtshylyǵynyń suranysyn qamtamasyz etý úshin óz aqparattyq áleýetin nyǵaıtý, paıdalanýshylardyń óskeleń talabyn qanaǵattandyrý jáne joǵary estetıkalyq talǵam qalyptastyrý, aqparattardy bilýge degen talap-tilekterine qoldaý kórsetý, elektrondyq resýrstardy tıimdi qoldanýǵa úıretý eken. Kitaphana qoryn túrli qu­jattarmen qamtamasyz etip, jastardy oqýǵa tartý maq­satynda uıymdastyrylǵan ak­sııaǵa Qazaqstan Jazýshylar odaǵynyń Qyzylorda oblystyq fılıalynyń dırektory, aqyn Qarshyǵa Esimseıitova, jazýshy Begimbaı Uzaqbaev, Qyzylorda memlekettik ýnıversıtetiniń professory M.Mataev, ǵalym­dar, zııaly qaýym ókilderi, sý­retshiler men kitaphananyń tu­­raqty oqyrmandary qa­tys­ty. Aımaqtardan jeke azamattar arnaıy habarlasyp, tartý-taralǵysyn usyndy. Atap aıtqanda, A.Sopybekov, A.Sádibekuly, R.Naýryzbaeva, S.Ańsatov, S.Jubatyrov, A.Sha­mahova, R.Bekbergenova, T.Tebegenov, N.Kóbegenuly, J.Jaqyp, Sh.Bekmaǵanbetov ózde­riniń týyndylaryn jáne jeke kitaphanalarynan qundy dúnıe­lerin syıǵa tartyp, qalyń oqyrmandy qýantty. Bylaı qarasańyz, kitaptar da adamdar sııaqty. Onyń da ózindik taǵdyry bar. Olar da tulǵalar sekildi adamzatpen birge jasaıdy, ıesimen birge týylyp, ıesimen birge ómir súredi. Kitap – adamdy arman bıigine samǵatady, aqyl-oı álemine sharlatady. Kitaphana foıesinde «Syıǵa tartylǵan kitaptar», «Sizdiń shyǵarmańyz» atty kórme uıym­dastyryldy. Oblystyq fılarmonııa ánshileri aksııaǵa qatysýshylarǵa án shashýlaryn syılady. Bul kúni kitaphana qory 202 dana kitappen tolyqty. Erjan BAITILES, «Egemen Qazaqstan». Qyzylorda oblysy.