Bıylǵy baıqaý burynǵydan ózgerek, festıvalǵa alǵash ret Mońǵolııa, Makedonııa, Norvegııa, Fınlıandııa mýzykanttary qatyspaq jáne ónerpazdardyń ónerine baǵa beretin qazylar alqasynyń quramy salmaqty. Sondaı-aq, uıymdastyrýshylar dodany qyzyqty etý úshin konserttik baǵdarlamaǵa qupııa syılyq ázirlep otyrǵanyn aıtty. III halyqaralyq klassıkalyq mýzyka festıvalinde baq synaıtyn toǵyz jáne on segiz jas aralyǵyndaǵy otyz úmitkerdiń tórteýi ózimizdiń órender. Kishi topta toǵyz jasar Nursultan Omarǵazın kúısandyq qudiretin kórsetse, orta topta Bekzat Raqymov, eresek topta Nazerke Qabdrahmanova men Sanjar Zulpyharov el namysyn qorǵaıdy. О́ner de sport sekildi, únemi jattyǵýdy qajet etedi. Mýzyka álemindegi aspaptardyń ishinde pıanınomen beriletin sezim syry ózgeshe. Mosart pen Bethovenniń súırikteı saýsaǵyn pernege tıgizbeı-aq ásem ún áýelettirgen bul quraldyń qazaqtyń qobyzy ben dombyrasynan qasıeti kem emes. Eýropalyqtardyń pıanınony klassıkalyq mýzykanyń shyńyna kóterýinde úlken syr jatyr. Bul aspap pernesine saýsaǵy tıgen mýzykantty ol úlken danalyqqa jeteleıtindeı áser qalyptasqan. Mýzyka kisini jasyna qaraı bólmeıdi. Danalyq jolyn tapsań boldy, seni alysqa samǵatyp ushyra jóneledi. О́ner adamy meıirim men sulýlyqtyń jarshysy degen úlken júk arqalaıdy. Atalmysh konkýrstyń elimizdegi mýzyka ónerin damytýdaǵy mańyzy jaıly aıtylǵan baspasóz máslıhatynda jobanyń kórkemdik jetekshisi Denıs Masýev: «Talantty jasty ata-ana bir jaǵynan, al myqty pedagog ekinshi tusynan barynsha qoldap otyrýǵa tıis, áıtpese, bir ǵana daryn óz kúshimen alysqa uzap kete almaıdy. Mýzykalyq aspaby bolmasa, qajetti jabdyǵy jetpese, ónerin baǵalap, arqasynan qaǵyp otyratyn tulǵa bolmaǵan jaǵdaıda, eńbektiń bári esh ketedi, onda shynaıy talant qaıdan týady?» dedi. О́skeleń urpaqty rýhanı jaǵynan tárbıeleý úshin jáne olardyń shyǵarmashylyq jolynyń qalyptasýyna qoldaý kórsetý maqsatynda ótkizilip otyrǵan baıqaýdyń demeýshileri – Mádenıet jáne sport mınıstrligi, Astana qalasy ákimdigi jáne «AccordidiAstana» qoǵamdyq qory. «Mýzyka – qazyna saqtaıtyn qoıma, munda barlyq ult ókili óziniń baılyǵyn teń múmkindikte paıdalaný úshin salady» degen orystyń belgili kompozıtory Petr Ilıch Chaıkovskııdiń týǵanyna bıyl 175 jyl tolyp otyr desek, baıqaýdyń máni men mańyzy jaıly aıtylǵan jıynǵa Reseıdegi Marııa teatrynyń basshysy, maestro Valerıı Gergıevtiń qatysýy da beker emes. Jeńistiń 70 jyldyǵymen tuspa-tus kelgen jas oryndaýshylar baıqaýyn ótkizý Qazaqstan úshin úlken jetistik ekenin aıtqan óner ıesi halqymyzdyń «balany jastan...» degen qaǵıdasyna tolyq qosylatynyn jetkizdi.
Qundyz ERALY.
ASTANA.
