Erlik eskerýsiz qalmaıdy

Astanada saıasattanýshy Berik Ábdiǵalıulynyń «Zabytye geroı. Geroı Sovetskogo Soıýza» atty kitabynyń tusaýkeser rásimi ótti. Bul eńbekte Ekinshi dúnıejúzilik soǵysta erekshe kózge túsip, qajyr-qaıratymen kópke úlgi bolǵan otandastarymyzdyń eren erligi arqaý bolǵan. Búgingi kúnge deıin 1941-1945 jyldar bederindegi Qazaqstan týraly az kitap jazylyp, az fılm túsirilmegen. Alaıda, surapyl soǵysta ot pen oqtyń arasynda júrse de erlikteri eskerýsiz, esimderi eleýsiz qalǵan talaı batyrdyń bolǵany anyq. Bul kitapqa sondaı azamattardyń kúreskerligi ózek bolypty. Iаǵnı, munda zulmat jyldary kórsetken erlikteri úshin der kezinde «Keńes Odaǵynyń Batyry» ataǵyna usynylyp, biraq, belgisiz sebeptermen batyr ataǵy berilmegen, tipten el jadynan óshýge aınalǵan qarııalar týraly tyń málimetter toptastyrylǵan. Kitap avtory osydan 5 jyl buryn Memlekettik tildi damytý qorynyń dırektory qyzmetin atqaryp turǵan kezinde «Halyq batyry» jobasy aıasynda soǵys jyldarynan habar beretin tyń derekterdi izdestirý, saralaý, zert­teý, qorytý maqsatynda úlken jumys atqarypty. Jeńistiń 70 jyldyq mereıtoıy sheńberinde júzege asyrylǵan bul eńbek – sonyń ıgi nátıjesi. Ázirge, «Keńes Odaǵynyń Batyry» ataǵyna usynylǵan 10 qazaqstandyq batyr jaıynda ǵana maǵlumat pen qujat tabylypty. Reseıdiń Qorǵanys mınıstrliginiń muraǵatynan alynǵan mańyzdy málimetterdiń basym kópshiligi alǵash ret jurtshylyqqa usynylýda. Eńbek avtorynyń aıtýynsha, jobanyń maqsaty – tarıhı ádilettilikti qalpyna keltirý jáne jas urpaq boıyna otansúıgishtik qasıetti sińirý. Al bul bastamaǵa «Nur Otan» partııasynyń Qoǵam­dyq saıasat ınstıtýty men «Baıkadam Holdıng» kompanııasy qoldaý tanytqan eken. Láıla EDILQYZY, «Egemen Qazaqstan».