Uly Jeńistiń 80 jyldyǵyna oraı Eýrazııa ulttyq ýnıversıtetinde maıdandaǵy qazaq batyrlarynyń belgisiz muraǵat hattary jınaqtalǵan «Hat jazdym qalam alyp qan maıdannan» atty kitaptyń tusaýkeseri ótti.
Sharaǵa memleket jáne qoǵam qaıratkeri Qýanysh Sultanov, L.N.Gýmılev atyndaǵy Eýrazııa ulttyq ýnıversıtetiniń rektory, QR Ulttyq ǵylym akademııasynyń akademıgi Erlan Sydyqov, jazýshy-pýblısıst Saýytbek Abdrahmanov, jýrnalıst-jazýshy Janat Elshibekov, QR Parlamenti Májilisiniń depýtattary Janarbek Áshimjan men Qazybek Isa, jazýshy, ǵalymdar, stýdentter qatysty.
Jınaqta Uly Otan soǵysynyń ataqty batyrlary Baýyrjan Momyshuly, Málik Ǵabdýllın, Ázilhan Nurshaıyqov, Álııa Moldaǵulova sııaqty belgili tulǵalarmen qatar aty beımálim, 130 qazaq jaýyngeriniń maıdannan jazǵan sálem hattary, óleń hattary, áni men áýeni bar lırıkalyq hattary toptastyrylǵan. Sonymen qatar kitapta Memleket basshysy Qasym-Jomart Toqaevtyń ákesiniń maıdannan qaıtpaı qalǵan týǵan aǵasy Qasym týraly esteligi berilgen.
L.N.Gýmılev atyndaǵy Eýrazııa ulttyq ýnıversıtetiniń rektory, tarıh ǵylymdarynyń doktory, QR Ulttyq ǵylym akademııasynyń akademıgi Erlan Sydyqov óz sózinde bul jınaqty Eýrazııa ulttyq ýnıversıtetiniń ǵalymdary daıyndaǵanyn erekshe atap ótti.
«Bul – bizdiń ýnıversıtet ǵalymdarynyń eńbegi. Kitaptyń ereksheligi sol, maıdannan jazylǵan hattardy jınaqtap, januıalardan surastyryp, buryn esh jerde jarııalanbaǵan hattardy engizdik. Bul eńbek ári qaraı jalǵasyn tabatyn bolady. Sebebi qazir ár úıde saqtalǵan hattar jetkilikti. Mıllıondaǵan hattar áli jaryq kórmeı jatyr. Soǵystyń qasiretin, sumdyǵyn túsiný úshin muraǵattaǵy kitap, qujattar, estelik, kınofılmder azdyq etedi. Soǵystyń shyn mánin bizge sol qan maıdanda júrip, ózi sezingen dúnıelerdi eldegi týǵandaryna jazǵan hattar keńinen bere alady. Biz soǵystyń tereń, qatygez beınesin túsindirý arqyly ǵana beıbitshiliktiń qunyn bile alamyz», – dep atap ótti akademık Erlan Sydyqov.
Bul jınaqtaǵy hattardyń negizgi bóligi Ulttyq ǵylym akademııasynyń Sırek kitaptar men qoljazbalar qorynan alynyp, jaryqqa shyǵyp otyr. Kitaptyń jalpy redaksııasyn basqarǵan – tarıh ǵylymdarynyń doktory, akademık Erlan Sydyqov.
Hattardy suryptaý barysynda túrli ómir talqysy, sóz saptaý úlgileri, qaharly, aýyr jyldardaǵy halyqtyń oı-óresiniń jalpy kórinisi kitapta tolyq oryn alǵan. Jınaqtyń maqsatynyń biri – habar-osharsyz ketken qazaq jaýyngerleriniń esimderin hattary arqyly tarıhta qaldyrý.
Memleket jáne qoǵam qaıratkeri Qýanysh Sultanovtyń aıtýynsha, bul kitap jeńil oqylatyn kitaptar qatarynan emes.
«Kitapty jaıbaraqat otyryp oqý múmkin emes, ishi tolǵan taǵdyr men tarıh. Bul – úlken qazyna. Qazirgi jastar soǵystyń ne ekenin, qandaı soǵys bolǵanyn bilý úshin bul eńbek óte qundy. Kitap jazý – ınemen qudyq qazǵandaı jumys. Elimiz tynysh bolsyn! Soǵysta qurban bolǵan atalarymyzdyń erlikterin umytpaıyq», – dedi spıker.
Sondaı-aq sharada jazýshy, QR Memlekettik syılyǵynyń laýreaty Saýytbek Abdrahmanov, QR Parlamenti Májilisiniń burynǵy depýtaty Darhan Myńbaı, QR Memlekettik Eltańbasynyń avtory Jandarbek Málibekov, jazýshy Shárbaný Beısenova jáne taǵy basqalar sóz sóılep, kitaptyń erekshe qundylyǵy týraly aıtty.
Ǵalymdardyń aıtýynsha, aldaǵy ýaqytta zertteý jumystary serııaly kitap túrinde shyǵarylady.
