Ákemdi saǵyna eske alamyn

Uly Otan soǵysyndaǵy jeńistiń 70 jyldyǵyn toılaıtyn kún jaqyndaǵan saıyn meniń de júregim lúp-lúp etedi. Sebebi, meniń jan ákem Otan qorǵaý jolynda bolǵan osy qandy maıdannyń bel ortasynda bolyp, Uly jeńiske óziniń aıtarlyqtaı úlesin qosqan. Sondyqtan, halqynyń bostandyǵy men baqyty jolynda kúresken aıaýly adamnan týǵanymdy maqtan tutamyn. Meniń ákem Qabdolla Meńdekın 1924 jyly Semeı oblysy Abaı aýdany Qundyzdy aýylynda týǵan edi. Ol 1943 jyly ásker qataryna alynǵannan keıin О́zbekstannyń Samarqan oblysyndaǵy áskerı oqý ortalyǵynda artıllerıst jáne baılanysshy mamandyǵymen qosa kishi komandırler kýrsyn bitirip, urys dalasyna attanǵan. Soǵysta Keńes Odaǵynyń Marshaly K.Rokossovskıı qolbasshylyq jasaǵan Ekinshi Belorýssııa maıdany áskerleri quramynda bolyp, Ýkraına, Polsha jáne Germanııa jerlerin azat etýge qatysqan. Soǵystaǵy kórsetken epligi úshin «Qyzyl Juldyz» ordenimen, «Erligi úshin», «Jaýyngerlik epligi úshin», «Kenıgsbergti alǵany úshin», «Germanııany jeńgeni úshin» medaldarymen marapattalyp, maıdan saıası basqarmasynyń bastyǵy, general-maıor Sýbbotınniń qolynan birneshe alǵys hat pen maqtaý qaǵazdaryn alǵan. 1947 jyldyń basynda elge oralyp, 1948 jyly anamyz Bátıma Kelbetovamen otbasyn qurǵan. Ákem 1947-1951 jyldary Aıakóz et kombınaty kadr bóliminiń bastyǵy, 1951-1955 jyldary Aıakóz aýdany «Qaraqol»  sovhozy jumysshylar komıtetiniń tóraǵasy, Júzaǵash aýyldyq keńesiniń tóraǵasy, «Sholpan» sovhozy partııa komıtetiniń hatshysy, 1955-1961 jyldary Aıakóz aýdandyq partııa komıtetiniń janyndaǵy «Bilim» qoǵamynyń tóraǵasy, Aıakóz qalalyq tutynýshylar qoǵamy men kommýnaldyq sharýashylyq mekemesiniń bastyǵy, 1961-1970 jyldary Tańsyq aýyldyq tutynýshylar odaǵynyń bastyǵy, «Qaraqum» qamys zaýytynyń dırektory, «Ovsevod» sovhozy partııa komıtetiniń hatshysy qyzmetterin atkarǵan. Men biletinde ákem iske qabiletti, prınsıpshil kommýnıst-maıdanger edi. Qaı salada eńbek etse de minsiz, batyl da adal qyzmet atqaryp, halqynyń qurmetine bólene bilgen eken. Soǵys zardabyn, qatal maıdan joldaryn basynan keshkennen bolar, aıaýly ákemiz bar bolǵany 46 jyl ómir súrip, ómirden ótip ketti. Bul kúnge ákemizdiń artynda 9 balamen jastaı qalǵan anamyzdyń tárbıesin kórgen bizder jettik. Bárimiz tańdaǵan mamandyqtarymyz boıynsha joǵary jáne arnaýly orta bilim alyp, ómirden óz ornymyzdy taptyq. Bári jaqsy. Tek ákemizdiń osy kúnge jete almaı, jastaı ketip qalǵany ǵana qınaıdy. Sol sebepti, Uly Jeńis merekesi qarsańynda ákemdi saǵynyshpen eske alyp otyrmyn. Tileýǵaısha MEŃDEKINA.