Astana qalasynyń turǵyny kúıeýin qatygezdikpen óltirdi

ASTANA. 6 mamyr. Elorda turǵyny kúıeýin asqan zulymdyqpen óltirgen. Búginde aýdandyq prokýratýra 67 jastaǵy er adamnyń ólimine qatysty qylmystyq isti óz baqylaýyna alǵan. Bul týraly Astananyń Almaty aýdandyq prokýratýrasyna silteme jasap, tengrinews.kz habarlady. Osy jyldyń naýryz aıynda polısııaǵa Astana qalasynyń turǵyny kelip, kúıeýiniń ushty-kúıli joǵalyp ketkenin aıtyp, shaǵymdanǵan. Áıeldiń sózine qaraǵanda, kúıeýi úıinen shyǵyp ketken kúıi múlde oralmaǵan. Keıin polısııa qyzmetkerleri adam ólimine kúdikti retinde 48 jastaǵy áıeldiń ózin – joǵalyp ketken er adamnyń jubaıyn qolǵa túsiredi. Tergeý barysynda erli-zaıyptylardyń arasynda urys-keris bolǵany, daýdyń sońy janjalǵa ulasqany belgili boldy. Almaty aýdandyq prokýratýrasy taratqan málimetterge súıensek, tóbeles kezinde áıeli kúıeýin tunshyqtyryp óltirgen. Al kelesi kúni áıeli kúıeýiniń óli denesinen qutylmaq bolady. «Máıitti tutastaı páterden kóterip alyp shyǵa almasyn, onyń ústine úıdiń kireberisinde beınebaqylaý kamerasy ornatylǵanyn bilgen aıyptalýshy kúıeýiniń denesin bólshektep tastaýdy durys dep sheshken. Marqumnyń denesiniń bólikterin taný múmkin bolmas úshin onyń basyn pisirgen. Osydan keıin barlyǵyn sómkege salyp, Astrahan tas joly boıyndaǵy molada jerlengen kúıeýiniń anasynyń janyna kómip tastaǵan», – deıdi qandy oqıǵany egjeı-tegjeı baıandap bergen Almaty aýdandyq prokýratýrasy tergeý bóliminiń bastyǵy Arsen Begalın. Bólim bastyǵynyń sózine qaraǵanda, atalǵan qylmysty tezirek ashý maqsatynda qylmystyq izdestirý organdaryna adam óliminiń basty nusqalaryn saraptaý júktelgen. Quzyrly organ taratqan habarlamada, kúdikti áıeldiń aldymen kúıeýin óltirgenin moıyndaǵany, keıinnen ol jaýabynan bas tartqany da aıtylady. Astana qalasynyń Almaty aýdandyq №2 tergeý soty sýdıasynyń qaýlysymen 48 jastaǵy áıel qamaýǵa alyndy. Qazirgi tańda kúdiktige qatysty psıhologııa-psıhıatrııalyq saraptama taǵaıyndaldy. Saraptama qorytyndysy daıyn bolǵannan keıin is sotqa jiberiledi. Esterińizge sala keteıik, bul Astana qalasynda bolǵan alǵashqy aýyr qylmys emes. О́tken jyldyń tamyz aıynda dál osyndaı aıýandyqpen 18 jastaǵy qurbylaryn óltirgen úsh boıjetken sottalǵan bolatyn. Elaman Qońyr. Derek: tengrinews.kz. Sýret: rambler.ru.