Sýretti túsirgen – Jumabaı Musabekov
Búginde oblysta uly maıdandy kórgen kózi tiri eki aqsaqal ǵana qaldy. Áıtse de bul topyraqtan myńnan asa sarbaz attanǵan edi. Olardyń jartysyna jýyǵy ǵana elge oralǵan. Solardyń ónegeli jolyn qazir urpaqtary jańǵyrtyp otyr. Máselen, saltanatty jıynǵa kelgen batyrdyń nemeresi Aıjan Nurmaǵambetova atasynyń júrip ótken jolyn baıandap, kópshiliktiń kóńilin tolqytty.
«Bizdiń atamyz búkil sanaly ǵumyryn áskerı salaǵa arnady. Bul – jas urpaq jalǵastyrýǵa turatyn, jalǵastyrýǵa tıis ónegeli jol. Ol úshin «paryz», «mindet» degen sózderdiń mańyzy erekshe edi. Sondyqtan bolar, onyń jalǵyz uly alǵashqylardyń biri bolyp Chernobyl apatynyń zardabyn joıýǵa attandy. Qazir elimizdiń barlyq qalasynda Saǵadat Nurmaǵanbetovtiń esimimen atalatyn kósheler bar», dedi ol.
Kóshe ataýyn berý týraly bastamany Taldyqorǵan qalalyq Qarýly kúshter ardagerler keńesiniń ókilderi kótergen bolatyn. Bul bastama tıisti onomastıkalyq komıssııa tarapynan qoldaý tapty. Atap ótsek, oblys ortalyǵynyń «Shyǵys» shaǵyn aýdanynda ornalasqan, buryn ataýy bolmaǵan kósheniń uzyndyǵy – 1,7 shaqyrym. Oblys ákimi baspasóz qyzmetiniń málimetinshe, Taldyqorǵanda Halyq qaharmany ataǵyna ıe adamǵa berilip otyrǵan alǵashqy kóshe sanalady.
«Is-shara – soǵys ardagerlerine, tyl eńbekkerlerine, beıbit ómir syılaǵan barsha aǵa býynǵa halyqtyń kórsetken úlken qurmeti dep bilemin. Saǵadat Qojahmetuly – erjúrek jaýynger ǵana emes, Qazaqstan Qarýly kúshteriniń tizginin ustaǵan memleket qaıratkeri. Ol táýelsizdiktiń alǵashqy jyldarynda armııanyń negizin qalaýǵa bar kúsh-jigerin jumsap, ólsheýsiz úles qosty. Osyndaı birtýar tulǵanyń áskerı murasyn zerdeleý, ónegeli ómirin urpaqqa nasıhattaý – bizdiń ortaq paryzymyz», dedi oblys ákimi Beıbit Isabaev.
Jetisý oblysy
