Sýretti túsirgen – avtor
Ulttyq statıstıka bıýrosynyń málimetinshe, byltyr elimizde jumyssyzdar sany 448,2 adam bolǵan. Bul 2023 jylmen salystyrǵanda 0,5%-ǵa kóp. Sol turǵyda mundaı jármeńke túlekterge taptyrmas múmkindik.
– Jármeńkede aýdandar men qalalardan 113 jumys berýshi 2 myńnan astam bos jumys ornyn usyndy. Jergilikti oqý oryndarynan 2 300-ge jýyq stýdent kelip qatysty. Qazirde oblysta muǵalim, dáriger, medbıke, qurylysshy mamandyqtaryna suranys artqany baıqalady, – dedi Mansap ortalyǵynyń dırektory Araılym Esimbekova.
Shekara shebindegi Marqakól aýdany ákimdiginiń ókilderi is-sharaǵa arnaıy kelip, memlekettik qyzmetke qyzyǵýshylyq bildirgen jas mamandardy jańa aýdanǵa jumysqa shaqyrdy.
– Qazir jekelegen bólimderde, ákim apparatynda, áleýmettik jumyspen aınalysatyn 28 bos jumys orny bar. Qyzyǵýshylyq bildirgender aıtarlyqtaı kóp dep aıta almaımyz, biraq kelip jatyr. Aýylda jumys isteýge nıetti jastarǵa múmkindik kóp. «Dıplommen – aýylǵa!» baǵdarlamasy arqyly baspana satyp alýǵa nemese salýǵa nesıe, kóterme járdemaqy beriledi, – dedi Marqakól aýdany ákimi apparaty jalpy bóliminiń basshysy Ásem Bolysova.
Sondaı-aq Katonqaraǵaı aýdanynda salynyp jatqan áýejaıǵa da mamandar, atap aıtqanda, áýe qozǵalysy qyzmetine dıspetcher, meteorologııalyq qyzmetke sınoptıkter, radıotehnıkalyq jabdyqtarǵa qyzmet kórsetý ınjenerleri qajet.
– Jumysqa 21-27 jas aralyǵyndaǵy jastardy qabyldaımyz. Sondaı-aq taǵy bir basty talap – aǵylshyn tilin bilýge tıis. Eger qyzyǵýshylyq bildirip jatqandar bolsa, «Qazaeronavıgasııa» RMK-ǵa habarlasýǵa bolady, – deıdi qyzmetkerlermen jumys jónindegi bólim bastyǵy Gúljan Ǵadylbekqyzy.
Odan bólek, polısııa qyzmetine, tótenshe jaǵdaılar departamentine de mamandar kerek. Alys aýyldarda dárigerler, feldsherler jetispeıdi. Jumysshy mamandaryna da suranys joǵary. Ásirese traktor syndy aýyr tehnıkalardy tizgindeýge jastar qulyqsyz. Jármeńke kópshilikke múmkindik syılap, úmit otyn jaqty. Jumys berýshiler men jumys izdegender nómir almasyp, tizimdelip, kóptep tirkelip jatty.
Shyǵys Qazaqstan oblysy
