Sýretti túsirgen – Tolǵanaı BATYRHAN, «EQ»
1992 jyl. Jańa ǵana táýelsizdigin jarııalaǵan elimiz eńsesin tiktep, bet-beınesin aıqyndaıtyn resmı rámizderin izdep jatqan kez edi. Qazaq jurty tarıh sahnasyna óz týymen, óz tańbasymen shyǵýǵa bel býdy. Osy shaqta Joǵarǵy Keńes eltańba jasaýǵa ashyq baıqaý jarııalady. Bul habar talaı sýretshiniń júregin dir etkizdi. Ásirese alysta júrgen azamat – Tashkenttegi Memlekettik jobalaý ınstıtýtynda qyzmet etetin sáýletshi Jandarbek Málibekov úshin bul úndeý – ómirlik mıssııasymen úndesken shaqyrý edi. Baıqaý jarııalanǵanyn onyń qalaı bilgeni de qyzyq.
«Qyzmet istep júrgenimde týǵan jerim – Qyzylordadan qonaqtar jıi keletin. Sondaı kúnniń birinde elden kelgen meımanym «Lenınshil jas» gazetin qolyma ustatty. Atajurttyń jańalyqtaryn bilip otyrsyn dep ákelse kerek. Men ony keıinirek oqımyn dep qoıa saldym. Biraq dál sol gazette ómirime úlken betburys jasaıtyn aqparattyń jarııalanǵanyn bilgen joqpyn. Kúnderdiń kúninde jumystan qalt etip qolym bosap, esime elden kelgen gazet tústi. Ashyp oqı bastadym. Aıqarma bettegi taqyryp jarq ete qaldy: «Qazaqstan Respýblıkasy óziniń Eltańbasyna konkýrs jarııalaıdy!» Bul úlken múmkindik ekenin túsindim. Alamanǵa at qosý kerektigin uqtym. Sóıtip, Eltańba jobasyn abyroımen jasap shyqtyq», dedi abyz aqsaqal. Sóıtip, kózin alysqa jiberip, bir tynystap aldy da áńgimesin ári qaraı jalǵady:
«Mundaǵy negizgi detal – gazet qoı. Qudaı biledi, sol gazet qolyma jetpegende, ony yqylasym aýyp qaıtadan oqymaǵanymda bul tarıhı oqıǵaǵa qatysa almaıtyn edim. Eltańba basqa bolar edi, men de basqa bolar ma edim... Sondyqtan gazet – men úshin asa qasterli dúnıe. Ony osy sebepti qaldyrmaı oqımyn. Áńgimelesken azamattarǵa da osyny jıi aıtamyn. О́zge memlekettermen ıyq tirestirip, qarqyndy túrde alǵa jyljý úshin, tarıhty bilip, bolashaqty baǵamdaý úshin – basylymdy nazarda ustaý qajet. Gadjetter qansha damyǵan zamanda ómir súrsek te, gazet oqý – arıstokratııalyq ádet bolyp qala bermek».
Mine, ózi aıtqandaı myrza kóńildi, bekzat bolmysty Jandarbek Málibekulynyń aýzynan estigen taǵylymdy áńgime osy boldy. Ár nársege bir dúnıe sebep bolady. Eshnárse kezdeısoq emes. Eltańba avtorymen suhbat bizdi osyndaı oıǵa qaldyrdy.
