Atalǵan jospar aıasynda jalpy qýattylyǵy 26 gıgavattan asatyn jańa energetıkalyq jobalardy kezeń-kezeńimen iske qosý kózdelgen. Bul bastama eldegi qýat tapshylyǵyn boldyrmaýǵa, energetıkalyq qaýipsizdikti qamtamasyz etýge jáne energııa júıesiniń turaqtylyǵyn arttyrýǵa baǵyttalǵan.
2024 jyldyń qorytyndysyna sáıkes elimizdiń Birtutas elektr energetıkalyq júıesinde (BEEJ) elektr energııasyn óndirý kólemi 117,9 mlrd kılovatt-saǵatty qurady. Al tutyný kólemi 119,9 mlrd kılovatt-saǵatqa jetti. Osy aralyqtaǵy aıyrmashylyq elektr qýatyna degen suranystyń ulǵaıyp kele jatqanyn kórsetedi. Sonymen qatar, elektr energetıkasy salasyndaǵy jabdyqtardyń ortasha tozý deńgeıi búginde 56 paıyzdy qurap otyr. Bul – jańa qýattardy engizý men qoldanystaǵy stansııalardy jańǵyrtý qajettigin aıqyndaıtyn negizgi faktorlardyń biri.
Energetıka mınıstrligi ázirlegen 2035 jylǵa deıingi elektr energetıkasyn damytý jónindegi is-sharalar jospary mynadaı baǵyttardy qamtıdy:
-
5,5 GVt – jumys istep turǵan elektr stansııalaryn jańǵyrtý, rekonstrýksııalaý jáne keńeıtý arqyly;
-
12,4 GVt – ártúrli pysyqtaý satysyndaǵy jańa generasııa jobalary esebinen;
-
3,8 GVt – ınvestorlarmen birlesip iske asyrylatyn iri jańartylatyn energııa kózderi (JEK) jobalary arqyly;
-
4,5 GVt – JEK boıynsha aýksıon nátıjeleri negizinde iske qosylýy josparlanǵan qýattar.
2024 jyldyń ózinde mınıstrlik jalpy qýaty shamamen 2 gıgavatty quraıtyn qondyrǵylardy jańǵyrtý, keńeıtý jáne jańartý boıynsha energııa óndirýshi uıymdarmen 14 ınvestısııalyq kelisimge qol qoıdy.
Energetıkalyq jobalardy iske asyrýmen qatar, mınıstrlik dekarbonızasııa baǵytyna da erekshe kóńil bólýde. 2060 jylǵa deıin kómirtegi beıtaraptyǵyna qol jetkizý jónindegi mindettemeler aıasynda ekologııalyq turǵydan taza tehnologııalardy engizý boıynsha sheteldik jáne otandyq ınvestorlarmen tyǵyz yntymaqtastyq ornatylyp jatyr.
Atalǵan sharalar kesheni elimizdiń elektr energetıkasy júıesinde týyndaýy múmkin tapshylyqtyń aldyn alýǵa, qajetti qýat rezervin qalyptastyrýǵa jáne uzaq merzimdi energetıkalyq turaqtylyqty qamtamasyz etýge múmkindik beredi. Bul – ulttyq ekonomıkanyń senimdi ósýine negiz bolatyn basty baǵyttardyń biri.
