Sýretti túsirgen – Jumabaı Musabek
Álemdik hám ulttyq tanymdy ushtastyratyn jas býyndy tárbıeleý – búgingi kúnniń talaby. Osy maqsatta qurylǵan ádebı mektep – jas urpaqtyń jazýǵa degen yntasyn oıatyp, sóz qudiretin tereń sezinýge baýlıdy. Basty murat – sózge adal, oıǵa júırik, júrekke jaqyn urpaq qalyptastyrý.
Osydan 3 aı buryn «Qurmet» ordeniniń ıegeri, «Jetisý» gazetiniń bas redaktory Jumataı Ospanuly bastaǵan jetisýlyq qalamgerlerdiń rýhanı jobasy sanaýly ýaqytta talaı jas júrektiń shamyn jaqty. Oblys ákimdigi jáne mádenıet, bilim basqarmalarynyń qoldaýymen júzege asqan joba kóktemde Jetisý jerindegi óskeleń urpaqty ádebıetke tartty, kitap oqýǵa degen yntalaryn oıatyp, óleń, esse jazýǵa shyńdady. Osylaısha bastapqyda 200 bala oqytyp, arasynan tym bolmasa, 20 jas talantty taýyp, qanattandyrsaq dep josparlaǵan jobanyń qorytyndy keshinde 100-ge jýyq bala belsendilik tanytty.
Iá, qazaq halqynyń baı ádebıetimen otyqqan, rýhanı ýyzǵa qanyp ósken urpaqtyń bolashaǵy jarqyn bolmaq. Ásirese, eljandylyq pen otansúıgishtik qasıetti jıi uran etken búgingi ýaqytta árbir jasty tulǵa etip qalyptastyrýdyń eń tıimdi joly – olarǵa ádebıeti men tarıhyn tanytý. osylaı oıy ashyq, sanasy sergek býyn tárbıeleýge bolady. El muratyna muryndyq bolar izgilikti iske arna tartqan «Mızam» jyljymaly ádebıet mektebiniń ustazdary 3 aı kóleminde aýyl-aýyldardy aralap, ár óńirde apta boıy jas talanttarǵa dáris berdi. Osylaısha, keýdesinde qozdap jatqan daryn shoǵyn úrlep, jalynǵa aınaldyrǵandaı jas óskinniń janaryna ot, jigerine serpin bergen «Mızam» jobasy máresine jetti.
Alǵashqy kezeńde kózdegen maqsattan bıik nátıje kórsetken jobanyń aýqymy keńeıýi múmkin. О́ıtkeni atalǵan jyljymaly ádebıet mektebine elimizdiń Batys Qazaqstan, Shyǵys Qazaqstan, Jambyl oblystary da ynta tanytyp otyr.
Oblys ortalyǵyndaǵy Oqýshylar saraıynda órnek tapqan qorytyndy keshtiń alǵashqy bóliminde 8 aýdan, 2 qaladan arnaıy kelgen shákirtter men olardyń jetekshilerin qarsy alý saltanaty uıymdastyryldy. Jazý sheberligi men kitap oqý mádenıeti boıynsha tálim alǵan 200-den astam oqýshynyń fınaldyq kezeńge joldama alǵan 100-i qyzyl kilemmen júrip ótip, Oqýshylar saraıyna endi. Onda búginde ult ádebıetine óziniń kesek-kesek, shyraıly týyndylary arqyly olja salyp, el súıip oqıtyn avtorǵa aınalǵan Esbolat Aıdabosyn, Qanat Tileýhan, Erǵalı Baqash syndy aqyn-jazýshylardan qoltańba alý rásimi ótti. Aqtyq synǵa kelgen 100 oqýshy «Mızam» jyljymaly ádebıet mektebi syılaǵan 100 kitapqa qoltańba qoıyldy.
Qorytyndy keshtiń kelesi bóliminde ádebıet baıqaýlarynda top jarǵan, elge esimi tanylǵan Esbolat Aıdabosyn, Erǵalı Baqash, Qanat Tileýhan syndy aqyn-jazýshylar «Mızam» mektebi saralaǵan oqýshylarmen kezdesti. Suraq-jaýap formatynda ótken kezdesý barysynda ár shákirt ózin tolǵandyrǵan saýaldardy qoıdy. Ádebıet, mádenıet, qoǵam men zaman, qundylyqtar, adam baqyty, armany qunsyzdanǵan ýaqyttaǵy máseleler de suraq bolyp jaýdy.
Jazýshy Qanat Tileýhan «Medal» shyǵarmasy haqynda qoıylǵan birneshe saýal tóńireginde óz oıyn aıtyp: «Qandaıda bir eńbek laıyqty baǵasyn alýy kerek, degenmen keıbir ataq pen qurmet adamdardy qurdymǵa, quldyraýǵa alyp barady. Rejısser Bolat Atabaev «Ataq meniń talantyma talant qosyp bermeıdi» degen edi. Ári ol kisi joǵary marapat pen ataqtardan sanaly túrde bas tartty», dep tolǵandy.
Osylaısha, aqyn-jazýshylardyń shyǵarmasynan ózin tolǵandyrǵan tusyn surap, san túrli taqyryp talqyǵa túsken keshte «Mızam» mektebiniń shákirtteri kópti alǵyrlyǵymen qýantty. Mirdiń oǵyndaı saýaldar qoıdy. Ulttyq turǵyda tolǵandyrar taqyryptarǵa bastar san saýalǵa jaýap izdedi. Igilikti sharanyń negizgi bóliminde Jumataı Ospanuly «Mızam» jyljymaly ádebı mektebiniń jumysyna az-kem toqtalyp ótti. Arnaıy daıyndalǵan beınerolık kórsetildi.
Qazaqtyń kórnekti aqyndary, Qazaqstannyń qurmetti jazýshysy Ámire Árin, Núsipbaı Ábdirahym bastaǵan zııaly qaýym ókilderi men is-sharanyń qadirmendi meımandary fınaldyq kezeńge joldama alǵan 100 oqýshynyń arasynan úzdik tanylǵan 15 oqýshyny marapattady. Úzdik 15 shákirt sapynan tanylǵan jas sańlaqtar «Mızam» mektebiniń Alǵys hatymen, 50 myń teńgelik sertıfıkatpen marapattaldy.
Jetisý oblysy
