Oblysta jyl basynan beri Uly Jeńistiń 70 jyldyǵy aıasynda kóptegen ulaǵatty sharalar uıymdastyryldy. Bul joly 7 mamyr – Otan qorǵaýshy kúni qarsańynda Tuńǵysh Prezıdent N.Nazarbaev atyndaǵy ortalyq mádenıet jáne demalys saıabaǵyndaǵy týtuǵyr alańynda «Áskerge shaqyrýshylar kúni» ótkizildi. Sharaǵa UOS ardagerleri, tyl eńbekkerleri, áskerge shaqyrylýshylardyń ata-analary, Aýǵan jáne lokaldy soǵystardyń ardagerleri, áskerı qyzmetshiler, kýrsanttar, JOO stýdentteri, mektep oqýshylary men patrıottyq klýbtardyń músheleri qatysty. Osy jerde áskerge shaqyrylǵan 40 jas Uly Jeńistiń qurmetine Astanada ótetin merekelik áskerı paradqa qatysatyn 15 soǵys ardagerimen kezdesip, aǵa urpaqtyń batasyn aldy.
Oblys ákimi Arhımed Muhambetov Astanada ótetin paradqa qatysatyn soǵys ardagerleri men bolashaq Otan qorǵaýshylar jáne olardyń ata-analary aldynda sóz sóılep, alda kele jatqan mereıli merekelermen quttyqtady. Egemen elimizdiń Qarýly Kúshteriniń qýattylyǵyna toqtala kelip, TMD elderiniń arasynda aldyńǵy qatarda ekenin atap ótti. Oǵan aqtóbelikterdiń ózindik úles qosyp kele jatqanyn, tek táýelsizdik alǵannan bergi ýaqytta 16 myńnan astam aqtóbelik ásker qatarynda bolǵanyn, al, bıyl 2 myńnan astam jastardyń ásker qataryna shaqyrylyp otyrǵanyn jetkizdi. Áskerge shaqyrylǵandar men Uly Otan soǵysy ardagerleriniń kezdesýin urpaqtar sabaqtastyǵynyń aıqyn mysaly retinde atap ótti. Uly Otan soǵysynyń ardageri Andreı Andreev pen oblystyq qorǵanys isteri departamentiniń basshysy, polkovnık Ǵalymjan Jantórın áskerge attanýshylarǵa aq jol tiledi. Áskerge shaqyrylǵandar atynan sóz alǵan Danııar Ǵalymjanov aǵa urpaqtyń erlik isterine adal bolatyndaryn, áskerde jaqsy qyzmet etip, aqtóbelikterdi uıatqa qaldyrmaıtyndaryna sendirdi.
О́ńir basshysy Arhımed Muhambetov Uly Otan soǵysy ardagerleri Qaztaı Tynyshtyqov pen Andreı Andreevke «Eren eńbegi úshin» medalin tapsyrdy.
Aqtóbelik sarbazdar «Batys» aımaqtyq komandovanııasyna qarasty №41433 áskerı bólimde áskerı mindetterin óteıtin bolady. Áskerge shaqyrylǵandardy alyp ketýge kelgen osy áskerı bólim komandıriniń tárbıe jáne ıdeologııalyq jumystar jónindegi orynbasary, kapıtan Baqyt Álimbaevtyń aıtýynsha, áskerge shaqyrylǵan jastardyń densaýlyǵy myqty, Otan aldyndaǵy boryshyn óteýge yqylasty. Al bólimde olardyń ásker isin meńgerýge barlyq jaǵdaı bar.
Shara aıasynda úsh býyn ókilderi – ardagerler, qazirgi áskerı qyzmetshiler jáne bolashaq Otan qorǵaýshylar mektep pen JOO stýdentterimen kezdesti, sonymen qatar, Uly Otan soǵysy ardagerleri men áskerge attanýshylarǵa estelik syılyqtar tabystaldy.
Aqtóbe oblysy.
Satybaldy SÁÝIRBAI,«Egemen Qazaqstan».
