Ashylý saltanatynda oblys ákiminiń orynbasary Dosulan Aıtbaev óńir basshysy Marat Ahmetjanovtyń quttyqtaýyn jetkizip, balalardyń tamasha tabıǵat aıasynda tynyǵýyna sáttilik tiledi.
Tól tarıhymyz tunyp turǵan tamasha ólkede jańadan dos taýyp, taza aýa jutyp, móldir sýǵa shomylyp, jadyraǵan jaz qyzyǵyn kórý bir ǵajap. Muny bolashaqqa jasalyp jatqan qamqorlyq dep esepteýge ábden bolady, – dedi oblys ákiminiń orynbasary.
Kókshetaý qalasynan kelgen balalar toptarynyń jetekshileri oqýshylarmen birden til tabysyp ketipti. Ortaq taqyryp ta az emes. Máńgi jasyl qaraǵaılar men aq qaıyńdar kómkergen, tostaǵanǵa quıǵan sýdaı tolyqsyp jatqan kól jaǵasynda kókirekterine quıyp alar san alýan ádemi de áserli syr bar. Bala kóńili baıqaǵysh. Ár nárseni bilgisi keledi. Maıda tolqyndary birin-biri qýalap, jaǵalaýǵa asyqqan kól jaǵasynda turyp shúıirkelesken balalar kóz toıdyrar kórkem tabıǵattyń kelisti kelbetin jas jandaryna kóshirip alǵysy keletindeı. Jetekshiler «Dýman» pedagogıkalyq otrıadynan eken. Alǵyr, bilimdi, eń bastysy boılarynda óz isterine degen súıispenshilik bar. Josparlarymen de bólisip jatyr. Aldaǵy ýaqytta balalardyń rýhanı keńistigin kórkeıtetin mazmundy baıqaýlar ótkizbek, sport jarystary uıymdastyrylmaq. Keshkilik tabıǵat aıasynda jınalyp, qyzyqty áńgimeler órbitpek. Ol áńgimelerdiń negizgi baǵyty týǵan jer týraly. Ár perzenttiń týǵan jerge qyzmet etýi kerektigi haqynda. Sondaı-aq sulý tabıǵatty saqtaý úshin qyzmet etý jaıynda. Balalardyń basym bóligi Astanadan kelipti. Ekibastuzdan jetkender de bar.
– «Sokol» bul eń jaqsy lager. Men birneshe kún boldym, endi ketkim de kelmeı qaldy. Qazirdiń ózinde jańa dostarymmen qalaı qoshtasamyn dep ýaıymdap júrmin, – deıdi Astana qalasynan kelgen 8-synyp oqýshysy Nuraıym Berden.
«Sokol» balalar lageri «Kókshetaý» memlekettik ulttyq tabıǵı parkiniń aýmaǵynda ornalasqan. 6,3 gektar jerdi alyp jatyr. 320 oryndyq elimizdegi eń iri lagerlerdiń biri 1963 jyly paıdalanýǵa berilgen. Ýaqyt óte kele, bir mekemeden bir mekemege aýysyp, tek 2002 jyly ǵana bilim salasyna berildi. 2020 jyly qyzmeti birshama tozýyna baılanysty toqtatyldy. 2024 jylǵy 50 balalardy saýyqtyrý lagerin jańǵyrtý baǵdarlamasyna sáıkes «Nurmuqanov» jeke kásipkerliginiń senimdi basqarýyna 15 jylǵa berildi.
Birer aıdyń ishinde nysan jańaryp sala berdi. Lager dırektory Arǵyn Azbaevtyń aıtýyna qaraǵanda, tolyq jańartylǵan. Jatyn korpýsy, ashana, klýb, barlyǵy muqııat jóndelgen. Tipti burynǵy nysannyń qabyrǵasy ǵana qalǵan, ózgesi túgel jańartylypty. Jańa qazandyq ornatylǵan, aldaǵy ýaqytta lager jyl boıy jumys istemek.
Sanıtarlyq-epıdemııalyq jaǵdaıy talapqa saı. Uzaq jylǵy úzilisten keıin esigin aıqara ashqan saýyqtyrý orny alǵashqy kezekte 275 balany qabyldapty. Jyl sońyna deıin 8-15 jas aralyǵyndaǵy eki myń balaǵa qyzmet etpek. Lagerdiń jańarýy – memleket pen jeke bıznestiń birlese jumys isteýiniń nátıjesi.
Aqmola oblysy
