Foto: Ashyq derekkóz
Prezıdenttik ortalyǵynda belgili qazaqstandyq fototilshi, ólketanýshy Nurmuhammat Imamovtyń «Meniń Astanam: ótkeni men búgini» atty fotokórmesiniń saltanatty ashylýy ótti. Kórme Astana kúnine oraı uıymdastyrylyp otyr.
Ekspozısııaǵa Nurmuhammat Imamovtyń 40 jyldan astam ýaqyt ishinde «Aqmola pravdasy» jáne basqa da basylymdarda fototilshi retinde eńbek etken jyldarynda túsirilgen 300-den astam arhıvtik sýretteri engizilgen. Fotosýretterde elordanyń qalyptasý kezeńderi, sáýlet kelbetindegi ózgerister, turǵyndardyń kúndelikti ómiri men qarapaıym adamdardyń beınesi beınelengen.
Shara barysynda sóz alǵan Prezıdenttik ortalyqtyń dırektory Baqytjan Temirbolat fototilshiniń eńbegine eleýli baǵa berdi.
«Qazirgi Astana – tek ákimshilik ortalyq qana emes, ol – bir urpaqtyń Táýelsiz, damyǵan jáne gúldengen Qazaqstan týraly armanyn beıneleıtin sımvol. Elordanyń sáýletinde ulttyq dástúr men zamanaýı tehnologııalar úndesip, onyń tarıhynda erlik, eńbek jáne jasampazdyq jatyr. Nurmuhammat Imamovtyń fotojumystary – jaı sýret emes. Bul – óz dáýiriniń tynysyn sezine bilgen adamnyń kózqarasy, ózgeristerdi kórip, tarıhty saqtaı alǵan jannyń shynaıy hronıkasy. Onyń obektıvi – bizdi onjyldyqtarmen jeteleıtin jol. Bul kórme ótkenge kóz júgirtip, júrekpen sezinýge múmkindik beretin erekshe oqıǵa. Ol árbirimizdiń júregimizge jol tabatynyna senemin», dedi ol.
Kórmeniń ashylýy elorda turǵyndary men qonaqtary úshin mańyzdy mádenı oqıǵaǵa aınalyp otyr. Túrli kezeńderde túsirilgen Imamovtyń fotosýretteri qalanyń alǵashqy damý sátterinen bastap búgingi qarqyndy túrde ilgerilegen megapolıske deıingi joldy joǵarǵy shabytpen, keń aýqymdy kórneliktpen beınelegen.
«Men burynǵy Aqmolınsk qalasynda, Aqmolınsk kóshesinde týyp-óstim. Imamovtar otbasymen kórshi boldyq. Sondyqtan bul kórmeniń ashylýyna qatysý – men úshin erekshe tolǵanysty sát. Nurmuhammat Imamov tek sýretke túsirip qoıǵan joq – ol ýaqyt rýhyn saqtap qaldy. Onyń arhıvi – áli tolyq zerdelenbegen tiri tarıh. Áleýmettik jelilerde jarııalanyp jatqan onyń sýretteri – naǵyz mura. Onda bizdiń kóshelerimiz, úılerimiz, tanys júzder – bári jandy. Ár sýret – júregimizdiń, qalamyzǵa degen mahabbatymyzdyń aıǵaǵy. Ol munyń bárin ataq úshin emes, bolashaq urpaq úshin jasady. Endi osy isti jalǵastyrý – bizdiń paryzymyz», dedi ólketanýshy, OldAstana jobasynyń avtory Rafaıl Davletkıldeev.
Kórme kórermenderge elordanyń resmı emes, kúndelikti tirshiligin – aýlalaryn, kóshelerin, merekeler men qarapaıym ómir kórinisterin kórýge múmkindik beredi.
Aıta keteıik, «Meniń Astanam: ótkeni men búgini» fotokórmesi astanalyq turǵyndar men qonaqtar úshin 2025 jylǵy 10 tamyzǵa deıin Prezıdenttik ortalyqta ótedi.
