Sýretti túsirgen – Erlan OMAR, «EQ»
Buǵan, múmkin, ákemniń áseri de bolǵan shyǵar. Olaı deıin desem, birge týǵan baýyrlarymnyń bári birdeı oqýǵa qumartqan joq. Segiz balanyń ishinde Uran degen inimiz ekeýmiz kóp oqıtynbyz. Bir maqalamda ákemniń mektepte jumys isteıtin bir sińlime: «Nege gazet oqymaısyń, muǵalim emessiń be?» degen sózin keltirgen edim.
Ákem aýdandyq gazetten bastap, oblystyq, respýblıkalyq gazet-jýrnaldardy (onyń ishinde «Sosıalıstik Qazaqstan», «Mádenıet jáne turmys», «Qazaqstan áıelderi», t.b.) jazdyryp alatyn. Bizge arnap «Baldyrǵan», «Qazaqstan pıoneri» basylymdaryn aldyratyn. Gazettiń bir nómiri kelmeı qalsa, júgirip poshtaǵa baratynmyn.
Turaqty túrde oqý adamnyń kókjıegin keńeıtip, onyń iri tulǵaǵa degen qyzyǵýshylyǵyn arttyrady. Myna bir derek esimde qalypty: «Sosıalıstik Qazaqstan» gazetinen (1964 jylǵy bir nómirinen) Qanysh Sátbaevtyń qaıtys bolǵany týraly oqydym.
Keıin arnaıy oqý ornyn bitirip, oqytýshylyq qyzmetke turǵannan keıin basylymdardy ózim jeke jazdyryp alatyn boldym. Bala kezimnen kúni búginge deıin qol úzbeı jazdyryp alatyn gazetim – «Egemen Qazaqstan». Elmen etene sanalatyn basylym betterinen tanys tulǵalardy bólip-jarmaımyn. Áıtse de, Jarasbaı Súleımenov, Meırambek Tólepbergen, Janbolat Aýpbaev syndy qalamgerlerdiń maqalalaryn unatyp oqıtynmyn. Olardyń ishinde J.Súleımenovtiń kitaptary jeke kitaphana qoryma qosylǵanyn aıtyp ótsem, artyq bolmas. Búginde olardyń ornyn ózge avtorlar basty. Rýhanııat salasyn qaýzaıtyn Aıgúl Ahanbaıqyzynyń esimi jaqsy tanys. Árıne, oblys jańalyqtary – basty nazarymda.
Bıalash SÚIINKINA,
Qostanaı qalasynyń turǵyny
