Astana qalasy boıynsha qarjylyq monıtorıng agenttigi departamenti mekteptiń laýazymdy tulǵalaryna qatysty sotqa deıingi tergep-tekserý júrgizip jatyr. Tergeý derekterine qaraǵanda, QMA men UQK qyzmetkerleri birlesip júrgizgen jumystar nátıjesinde 900 mıllıon teńgeden astam qarjynyń urlanǵany anyqtalǵan.
Kúdiktiler qatarynda mekteptiń burynǵy dırektory men bas esepshi bar. Anyqtalǵandaı, ata-analar nólinshi synyptaǵy balalaryn oqytý jáne jazǵy lagerge qatystyrý úshin qolma-qol túrde tólegen aqshalar mektep shotyna túspegen. Bul qarjy mekteptiń resmı kirisinde kórsetilmeı, jeke maqsattarǵa paıdalanylǵan kórinedi.
Tergeý barysynda taǵy shamamen 16 mıllıon teńge mektepte is júzinde jumys istemegen aty bar, zaty joq tulǵalarǵa aýdarylǵany belgili boldy. Olardyń qatarynda kúdiktilerdiń týystary da bolǵan, alaıda olar mektep qyzmetkerleri retinde tirkelip, jalaqy alyp kelgen.
«Qylmystyq jolmen alynǵan qarajatqa jalpy quny 382 mıllıon teńge turatyn múlik – elordadan eki páter, kottedj jáne avtokólik satyp alynǵan. Qazirgi tańda sot sanksııasymen bul múlikke tyıym salyndy. Kúdiktiler ýaqytsha ustaý ızolıatoryna qamaldy», delingen resmı habarlamada.
Qylmystyq is materıaldary Qylmystyq-prosestik kodekstiń 201-babyna sáıkes jarııa etilmeıdi.
Aıta keteıik, buǵan deıin Oqý-aǵartý mınıstri Ǵanı Beısembaevqa elimizdegi mektepter men balabaqshalarda býhgalterler qatysqan jemqorlyq faktileri jıilep ketkeni jóninde suraq qoıylǵan edi. Mınıstrdiń aıtýynsha, birneshe jyl buryn mınıstrlik pen Sybaılas jemqorlyqqa qarsy qyzmet birlesip, mektepterdi, balabaqshalardy jáne mınıstrliktiń ózin jan-jaqty tekserýge kirisken. Sol ýaqyttan beri bilim berý salasyndaǵy urlyq-qarlyqtyń jalpy somasy 18 mıllıard teńgege jetkeni anyqtalǵan. Bul derekter sońǵy 5–6 jyl ishindegi jaǵdaıdy kórsetedi.
