Qazaq-fransýz kollokvıýmynyń tarıhy osydan 40 jyldaı buryn, 1986 jyly bastalǵan. Novosibirdegi akademqalashyqta fransýz logıgi ári lıngvısi Brıýno Pýaza men qazaq ǵalymy Tólendi Mustafın alǵash ret júzdesip, ózara qurmet pen ǵylymı qyzyǵýshylyq negizinde erekshe seriktestikke jol ashty. Sol kezdesýdiń nátıjesinde 1990 jyly Almaty men Qaraǵandyda alǵashqy qazaq-fransýz kollokvıýmy ótti. Sodan beri konferensııa geografııasy keńeıip, jyl saıyn túrli memlekette ǵylymı basqosýlar uıymdastyrylyp keledi.
1994 jyly Tólendi Ǵarıfulynyń ómirden ótýine baılanysty kollokvıým jumysy ýaqytsha úzilip qalǵan edi. Alaıda professor Brýno Pýazanyń bastamasymen forým 2000 jyly Qaraǵandyda qaıta jandandy. Bıyl da óziniń shákirtteri men ǵylymı izbasarlaryn ertip kelgen Brýno Pýaza jastar arasyndaǵy ǵylymı baılanysty nyǵaıtýǵa zor úles qosty. Ol qazirgi tańda E.A.Bóketov atyndaǵy Qaraǵandy ýnıversıtetiniń, L.N.Gýmılev atyndaǵy EUÝ-dyń qurmetti professory.
«Ǵylymda shekara bolmaýy kerek. Sol sebepti bul kollokvıým oqý ordamyzdyń mehanıka-matematıka fakýltetinde dástúrli túrde uıymdastyrylyp keledi. Biz Beıjiń ýnıversıteti, Joǵary ekonomıka mektebi, Máskeý memlekettik tehnologııalyq ınstıtýty, Novosibir memlekettik ýnıversıteti, sondaı-aq Lıon ýnıversıtetiniń kórnekti ǵalymdaryn qarsy alǵanymyzǵa qýanyshtymyz. Konferensııa barysynda tyń ǵylymı jańalyqtar aıtylatynyna senimdimin», dedi L.N.Gýmılev atyndaǵy EUÝ-dyń akademııalyq máseleler jónindegi prorektory Ardaq Beısenbaı.
Aıta keteıik, bıylǵy kollokvıýmǵa 70-ten astam qatysýshy jınaldy. Olardyń qatarynda Qazaqstan, Fransııa, Reseı, О́zbekstan, Qytaı, Ispanııa jáne basqa da memleketterdiń ǵalymdary bar. Konferensııa baǵdarlamasynda klassıkalyq modelder teorııasymen qatar, qazirgi zaman talabyna saı taqyryptar – krıptografııadaǵy logıkalyq ádister, algorıtmdik qurylymdar, logıka men til baılanysy, jasandy ıntellekt konteksindegi dálelder teorııasy syndy ózekti salalar qamtyldy.
