Bıyl hımııa páni boıynsha 57-shi Halyqaralyq olımpıada Birikken Arab Ámirlikterinde ótti. Álemniń 93 elinen 360-tan astam oqýshy qatysqan bul zııatkerlik doda – dúnıejúzindegi eń bedeldi pándik jarystardyń biri. Aıta keterligi, osynaý bilim báıgesine ár memleketten ári ketse tórt oqýshy ǵana qatysa alady. Al Qazaqstan ulttyq quramasyndaǵy tórt oqýshynyń tórteýi de tamasha nátıje kórsetip, eki altyn, eki kúmis medalǵa qol jetkizdi.
«IChO Halyqaralyq hımııa olımpıadasyna Qazaqstan qurama komandasy alǵash ret 1998 jyly qatysty. Sodan beri júlde qorjynymyz 12 altyn, 37 kúmis, 48 qola júldemen tolyqty. Al bıylǵy nátıjege keler bolsaq, Astanadaǵy fızıka-matematıka baǵytyndaǵy Nazarbaev Zııatkerlik mektebiniń 12-synyp oqýshylary Abylaı Qabdýlhadyr men Kırıll Kım altyn medal ıegeri atansa, kúmis medaldi Aqtóbe oblysyndaǵy «Bilim-ınnovasııa» lıseıiniń 10-synyp oqýshysy Ańsar Jaqsylyqov pen Almaty qalasyndaǵy hımııa-bıologııa baǵytyndaǵy Nazarbaev Zııatkerlik mektebiniń 12-synyp oqýshysy Eńlik Baqytbekova ıelendi. Aıta keterligi, Kırıll IChO-da osymen ekinshi ret altynnan alqa taǵyp otyr, al Abylaı ótken jyly dál osy halyqaralyq dodada kúmis medal ıelense, bıyl nátıjesin jaqsartyp, birinshi orynnyń tuǵyrynan kórindi.
Qazaqstan qurama komandasynyń jetekshisi Sanjar Begdaıyr men Rınat Eleýsizovtiń aıtýynsha, bıylǵy nátıje – rekordtyq kórsetkish.
«Eki kezeńnen turatyn olımpıadanyń alǵashqy teorııalyq synaǵynda bizdiń oqýshylar esh múdirmedi. Al praktıkalyq kezeńniń esepteri birshama kúrdeli bolǵan. Biraq balalar osylaı shyńdalady, nátıjeleri de jyldan jylǵa jaqsaryp keledi. Jalpy, saıys óte tartysty ótti. О́ıtkeni bıyl jarysqa qatysýshy memleketter sany birshama artqan. Aıta keterligi, elimiz dál osy Hımııa olımpıadasynan tórtinshi jyl qatarynan altyn medal alyp keledi. «Chempıon bolý qıyn. Chempıondyqty saqtap qalý odan da qıyn» degendeı, bıyl da oqýshylarymyz el úmitin aqtap, buǵan deıingi rekordtyq kórsetkishti jańartty», deıdi S.Begdaıyr.
Qurama komanda músheleri Olımpıadanyń aldynda Oqý-aǵartý mınıstrliginiń, «Daryn» respýblıkalyq ǵylymı-praktıkalyq ortalyǵynyń qoldaýymen birneshe respýblıkalyq jáne halyqaralyq oqý-jattyǵý jıynyna qatysyp, bilimderin shyńdaǵan. Sodan keıin júzdegen oqýshydan úzdik tórteýi iriktelip, álemdik dodada baq synady.
Aıta keteıik, halyqaralyq iri olımpıadalarda jeńiske jetken oqýshylarǵa elimizdiń joǵary oqý oryndaryna konkýrstan tys grantpen oqýǵa túsýge múmkindik beriledi. Sondaı-aq aqshalaı syıaqy tólenedi ári oqýshylardy daıyndaǵan tálimgerlerine de marapat qarastyrylǵan.
