Pavlodar oblysy shaǵyn jáne orta bıznesiniń kásiporyndary EKSPO-2017 jobasyna barynsha keńinen qatysýdy kózdep otyr. Olar qurylys jumystaryna ǵana emes, sonymen birge, logıstıkaǵa, qaýipsizdik pen qoǵamdyq tamaqtandyrý júıesin uıymdastyrýǵa keńinen tartylmaq. Osyndaı usynystar Pavlodar oblysynyń kásiporyndarymen taıaýda ótken jumys barysyndaǵy kezdesýdiń kún tártibine qoıyldy.
«Astana EKSPO-2017» UK bas merdigerlerimen kezdesýge osy aımaqtyń 30 ókili keldi. Kezdesýdiń maqsaty – pavlodarlyq kásiporyndardy, óńirdiń shaǵyn jáne orta bıznesin EKSPO-2017 jobasyna belsendi túrde tarta otyryp, kórmedegi jergilikti mazmunnyń kólemin ulǵaıtý.
«Kelisimshart aldyndaǵy mámilelerge budan buryn Pavlodarda ótken kezdesýde qol qoıylǵan bolatyn. Búgingi kezdesý – bizdiń birlesken jumysymyzdyń jalǵasy. 2014 jyly biz materıaldyń alǵashqy partııasyn jetkizdik. Pavlodardyń metallýrgııalyq kásiporyndary armatýrany 40 myń tonnaǵa deıingi kólemde jetkizýge daıyn, bul shetelden ákelinetin shıkizattyń ornyn tolyǵymen almastyratyn bolady», – dep atap ótti kezdesý kezinde Pavlodar oblysy ákiminiń orynbasary Nıkolaı Dychko. «Astana EKSPO-2017» UK jáne Pavlodar oblysy ákimdigi arasynda yntymaqtastyq týraly memorandýmǵa 2014 jyldyń jeltoqsanynda qol qoıylǵan bolatyn. Bıylǵy jyldyń 1 shildesindegi jaǵdaı boıynsha qazirdiń ózinde Pavlodar oblysynan qurylysqa 3 otandyq taýar óndirýshi tartylyp, jasalǵan kelisimsharttardyń jalpy somasy 760 mln. teńgeni qurap otyr. Kezdesýge metallýrgııa, mashına jasaý, hımııa, jıhaz jáne jeńil ónerkásip sekildi túrli salalardaǵy kásiporyndar qatysty. Olardyń arasynda bolat quıý zaýytyna ókildik etetin «Kastıng» JShS, sym-ótkizgish ónimderdi óndiretin «QazEnergoKabel» AQ jáne avtokólik joldary men áýejaı jabyndary qurylysynda qoldanylatyn penopolıstıroldy óndiretin «STIROL kompanııasy» JShS boldy. «Biz ótken jyldan bastap materıaldy jetkizýmen aınalysyp kelemiz, kelisimsharttardyń somasy ázirshe úlken emes, alaıda «temirbeton kezeńi», keıin árleý kezeńi jáne sym-tetikterdi júrgizý kezeńi bolatynyn túsinemiz. Sondyqtan biz ekinshi kezeńde jetkizilim somasy ósedi dep úmittenip otyrmyz. Qazir biz «BI Group» jáne «Bazıs-A» kompanııalarymen jumys jasap jatyrmyz, al «Mabetex» kompanııasymen kelissózder júrgizýdemiz», – dedi «QazEnergoKabel» AQ bas dırektory Oleg Krýk. Sondaı-aq, kezdesýge «Astana ESKPO-2017» UK-pen tyǵyz yntymaqtasa jumys jasaıtyn «Atameken» ulttyq kásipkerler palatasynyń ókilderi de qatysty. Qazirgi tańda otandyq taýar óndirýshilerdiń tizimi qalyptastyrylyp jatqany atap ótildi. Bul tizimniń ishine metallýrgııa, mashına jasaý, kabeldik ónimder salasyndaǵy kompanııalar ǵana emes, sonymen birge qyzmet kórsetý salasyndaǵy, árleý jumystarymen aınalysatyn kásiporyndar da kirgizilip otyr. Tizim «Astana EKSPO-2017» bas merdigerlerimen aradaǵy qatynas-baılanysty jaqsy qamtamasyz etý úshin qazaqstandyq taýar óndirýshilerdi biryńǵaı tizimge júıeleýge múmkindik bermek. Kezdesý kezinde «Astana ESKPO-2017» UK basqarma tóraǵasynyń orynbasary Almaz Jamanbekov bas merdigerler men otandyq taýar óndirýshilerdi dıalogqa shaqyryp, EKSPO-2017 jobasyna qatysýdyń túrli sharttary usynylǵanyn eske saldy. «Qazir kórmeniń resmı qatysýshylaryna usynylatyn turǵyn úı qurylysy júrgizilýde. Shaǵyn jáne orta bıznes te sonda damýy tıis. Tek qurylystyń sheńberinde tuıyqtalyp qalmańyzdar, ózderińizdiń kompanııalaryńyzdy túrli salalardaǵy jumystarǵa tartyńyzdar. Pavlodarda shaǵyn jáne orta bıznes jaqsy damyǵan. Sondyqtan bul múmkindikti logıstıkadan bastap, kólik, tamaqtandyrý júıesi, quqyq qorǵaý qyzmetin uıymdastyrýǵa deıingi jumystarǵa tartý qajet», – dep atap ótti Almaz Jamanbekov taýar óndirýshilerge arnap aıtqan sózinde. Mundaı kezdesýler aldaǵy ýaqytta Qazaqstannyń barlyq oblysynyń ókilderimen ótkiziledi. Qazirgi tańda «Astana EKSPO-2017» kórme nysandarynyń qurylysyna 101 qazaqstandyq kásiporyn tartylyp, jasalǵan kelisimsharttardyń jalpy somasy 88 mlrd. teńgeni quraǵanyn eske salamyz. Qazirdiń ózinde Qaraǵandy, Qyzylorda, Soltústik Qazaqstan, Pavlodar, Shyǵys Qazaqstan, Jambyl oblystarynyń ákimdikterimen jáne Astana qalasynyń ákimdigimen tıisti memorandýmdarǵa qol qoıylǵan.
«Egemen-aqparat».
