Foto: bilim-all.kz
Memleket basshysynyń tapsyrmasymen Kaspıı teńiziniń ekologııalyq máselelerin zertteý maqsatynda qurylǵan ǵylymı-zertteý ınstıtýtynyń (ǴZI) qyzmet aıasyna balyq qorynyń kólemin baǵalaý, olardy saqtaý ádisteri men tehnologııalaryn ázirleý, ıhtıofaýnany zertteý, ıtbalyqtardyń jappaı qyrylý sebepterin anyqtaý jáne olardyń popýlıasııasyn saqtaý máseleleri kiredi.
Úkimettiń baspasóz qyzmetiniń málimdeýinshe, budan bólek, teńizdiń gıdrologııalyq úderisterin zertteýge jáne onyń deńgeıin baqylaýǵa, klımattyń ózgerýin jáne onyń ekojúıege áserin taldaýǵa, sýdyń sapasy, bıologııalyq alýantúrlilik jáne Kaspıı teńiziniń otandyq bóligi men jaǵalaýynyń ózge de parametrleri jónindegi derekterdi jınaý men taldaýǵa baǵyttalǵan.
Úkimet rezervinen bólingen qarajat ınstıtýtty odan ári damytýǵa baǵyttalyp, gıdrobıologııa jáne gıdrohımııa, gıdrometeorologııa, spýtnıktik monıtorıng zerthanalarynda ǵylymı-zertteý jumystaryn ýaqtyly ári tıimdi júrgizýge, sondaı-aq ınstıtýtqa júktelgen ózge de mindetterdi oryndaýǵa múmkindik beredi.
Aıta ketelik, Kaspıı teńizi biregeı ekojúıe jáne sý bıoresýrstarynyń asa mańyzdy kózi, sondaı-aq batys óńirler men jalpy elimizdiń turaqty damýyna úlken úles qosady.
Kaspıı teńiziniń Qazaqstan tarapyndaǵy jaǵalaýynyń uzyndyǵy 2320 shaqyrym, bul barlyq Kaspıı mańy memleketteri arasyndaǵy eń uzyn jaǵalaý syzyǵy.
