Iri kompanııalardyń jetkizýshisine aınaldy
«Avrora Holdıng» transformatorlyq qosalqy stansalardy, maıly jáne qurǵaq kúshtik transformatorlardy usynsa, «Avrora Electric» JShS qurǵaq kúshtik transformatorlar men elektr peshteri transformatorlaryn óndirýge mamandanǵan. Kompanııa elektrotehnıkalyq jabdyqtar, sondaı-aq jıyntyq transformatorlyq qosalqy stansalar (KTP) óndiredi. Blokti-modýldi, tutas metaldy, ishki qondyrǵylardy, kerneýi 6, 10, 20 jáne 27,5 kV taratýshy qurylǵylardy shyǵarady. Búginde «Mańǵystaýmunaıgaz» AQ, «Qazgermunaı» birlesken kásiporny, basqa da iri munaı-gaz kompanııalarynyń áleýetti jetkizýshisi bolyp otyr.
Jumys tolyq avtomattandyrylmaǵan. Sharýanyń 80%-y áli de qol kúshimen atqarylady. Ǵ. Jeksembınov munyń sebebin tapsyrys kóleminiń birkelki bolmaýymen túsindirdi. Transformatorlardyń biri kólemi 6 sharshy metr bolsa, endi biri 0,5 m kóleminde daıyndalady. Syrtqy qańqasy – otandyq ónim, al ishki mıkrochıpter Qytaı, Reseı nemese Eýropa elderinen jetkiziledi. Biraq transformatorlardyń qasbetteri arnaıy avtomattandyrylǵan baǵdarlama boıynsha kesilip, pishiledi. Sol sebepti, mundaǵy úderis qaldyqsyz atqarylady.
Táýligine – 40 tonna
«Mıkrochıpterdi ózimizde óndirýge múmkindik bar. Ol aldaǵy kúnniń enshisinde», deıdi Ǵ.Jeksembınov. 2009 jyldan bastap holdıng medısınalyq mekemelerge arnalǵan dezınfeksııalyq quraldar men tamaq ishýge arnalǵan óndiristi iske qosty. Dezınfeksııalyq quraldardy medısınalyq mekemelerdiń barlyq qyzmetkeri paıdalanady, olar operasııa jasaý aldynda qolyn zararsyzdandyratyn hırýrgterden bastap, eden jýýǵa arnalǵan arnaıy zattardy sýǵa qosatyn tazalaýshylarǵa deıingi tizbekti qamtıdy. Munda táýligine 175 ataýdan turatyn 40 tonna ónim óndiriledi.
«Jýýǵa arnalǵan suıyq jáne gel tárizdi quraldardyń jańa jelisin iske qostyq. Sondaı-aq balalar ónimderiniń serııasyn usyndyq. 2024 jyldyń sońynda assortıment ydys-aıaqqa arnalǵan geldermen, balalar ydystaryn jýýǵa arnalǵan zattarmen, suıyq sabynmen jáne shampýnmen toltyryldy», deıdi «Avrora» óndiristik kesheni JShS bas dırektory Maksım Iаskel.
Kompanııanyń jeke zerthanasynda ónim muqııat testileýden ótedi, al tehnologter tutynýshylardyń qajettilikterin eskere otyryp, jańa reseptýralar ázirleıdi.
«2010 jyldardyń ortasyna deıin kosmetıkalyq ónimder men turmystyq hımııanyń 90–95%-y syrttan keletin. Bul shamamen alǵanda 500–800 mln dollardyń ónimi. Jergilikti óndirýshiler bar bolǵany 30–40 mln ónimin ǵana óz kúshimen shyǵaryp otyrdy. Zararsyzdandyrǵysh zattardy óndirý negizinde turmystyq hımııany daıyndaı bastadyq. Bul – ydystardy, áınekterdi, santehnıkany, akrıl vannalaryn, sebezgi kabınalaryn jýýǵa arnalǵan, aǵyzý qubyrlaryn tazartýǵa arnalǵan quraldar. О́nimniń ekologııalyq tazalyǵyna erekshe nazar aýdarylady, bul turǵyda resmı sertıfıkattarymyz bar», deıdi Maksım Iаskel.
Jyldyq qarjy aınalymy – 3–4 mlrd teńge
Biz taban tiregen úshinshi kompanııa – «Avrora77» JShS kásiporny. Munda blokti-modýldi ǵımarattar men metall qurylymdaryna arnalǵan taýarlar óndiriledi. Zamanaýı jáne tehnıkalyq jaǵynan jaraqtandyrylǵan jeke óndiristik bazasy bar. Kompanııa qyzmetiniń negizgi baǵyttary mynalar:
- Baqylaý munaralaryn qosa alǵanda, onyń ishinde brondy oryndaýdaǵy kúsh qurylymdary men qaýipsizdik qyzmetteri úshin metall qurylymdaryn jobalaý jáne óndirý;
- Telekommýnıkasııalyq kompanııalar úshin metall konstrýksııalaryn daıyndaý: antenna-dińgekti qurylystar, tehnologııalyq konteınerler jáne baılanys apparatýrasyn ornalastyrýǵa arnalǵan ózge de jabdyqtar;
- Túrli salalar úshin blokti-modýldi ǵımarattardy jobalaý jáne óndirý;
- О́nerkásiptik jáne azamattyq qurylys nysandary úshin metall konstrýksııalaryn jasaý.
Kompanııa basshysy Alıtet Ahmetovtiń aıtýynsha, kompanııanyń bir jyldyq qarjy aınalymy – 3-4 mlrd teńge. О́nim negizinen ishki naryqqa baǵdarlanǵan.
«Naryqtyń osy segmentinde kadr arasyndaǵy baılanystyń úzilip qalmaýy mańyzdy. Jastar jaǵy temirdi ınedeı maıystyratyn qol jumysyna kele bermeıdi. Sol úshin zeınet jasyna tolsa da tájirıbeli mamandardyń jumysyn jalǵastyrýyna múmkindik beremiz», deıdi Alıtet Ahmetov.
ALMATY
