Sýretti túsirgen – Jeńis Ysqabaı
Festıvalǵa elimizdiń ǵana emes, sheteldiń de belgili teatrtanýshylary men óner qaıratkerleri qazylyq etti. Olardyń qatarynda Qazaqstannyń halyq ártisi, Memlekettik syılyqtyń laýreaty, prodıýser ári rejısser Doshan Joljaqsynov, teatr synshysy, ónertaný doktory Baqyt Nurpeıis, Tatarstannan kelgen teatrtanýshy Nııaz Iglamov, Grýzııanyń belgili professory Georgı Skıtıshvılı, О́zbekstan ónertanýshysy Aıbek Kopadze boldy.
Qazylar qoıylymdardyń mazmunyna ǵana emes, rejısserlik sheshimine, akterlik oıynǵa, sahnadaǵy plastıka men dekorasııaǵa deıin jiti nazar aýdardy.
«Biz spektaklderdi san qyrynan baǵaladyq. Árbir qoıylymnyń janry da, ıdeıasy da ártúrli. Biraq eń bastysy – akterdiń shynaıylyǵy, kórermen júregine jetkize bilýi. Bul festıvaldyń ereksheligi – zamanaýı rejısserlerdiń batyl sheshimderi men akterlerdiń keıipkerdiń ishki jan dúnıesin ashyp kórsetýge degen talpynysy. Bes kún ishinde túrli elden kelgen teatrlar tájirıbe almasyp, ónerdiń ortaq tilde sóıleıtinin taǵy da dáleldedi. Mundaı mereke – ult rýhanııaty úshin úlken olja», dedi qazylar alqasynyń tóraǵasy Doshan Joljaqsynov.
Halyqaralyq festıvalǵa Qazaqstannan bólek Qyrǵyzstan, О́zbekstan, Ázerbaıjan, Grýzııa elderiniń teatrlary qatysty. Jalpy sany toǵyz ujym óner kórsetip, sahnada ártúrli taqyrypty kóterdi: tarıhı drama da, zamanaýı áńgime de, fılosofııalyq oılarǵa jeteleıtin qoıylymdar da boldy.
«Bul festıvaldyń eń qundy tusy – teatrlardyń bir-birinen úırenýi, tájirıbe almasýy. Sheteldik qonaqtardyń plastıkalyq sheshimderi men rejısserlik batyldyǵy, otandyq ártisterdiń akterlik shynaıylyǵy – barlyǵy kórermenge jańa áser syılady. Meniń oıymsha, «Biken fest» – jaı ǵana teatr merekesi emes, ol – ult rýhanııatyn baıytatyn, ónerdiń halyqaralyq deńgeıdegi dıalogine jol ashatyn úlken alań. Aldaǵy jyldary da jalǵasyn taýyp, Taldyqorǵandy álemdik teatrlar toǵysatyn ortalyqqa aınaldyratynyna senim mol», dedi teatrtanýshy Nııaz Iglamov.
Festıval qorytyndysynda toǵyz atalym boıynsha úzdikter anyqtalyp, bas júlde «Abaı aıtqan Eńlik-Kebek» spektaklimen Abaı oblystyq qazaq mýzykalyq drama teatryna buıyrdy. Bul qoıylym – hakim murasyna jańasha kózqaras, ulttyq murattar men máńgilik taqyryptardyń sahnadaǵy kórkem sheshimi retinde ádil baǵasyn aldy. Bas júldemen birge teatr ujymyna 1 mln teńgeniń sertıfıkaty tabys etildi.
Jetisý oblysy
