Prezıdent tapsyrmasynan keıin Úkimet aýqymdy reformalardy iske qosty, onyń ishinde shaǵyn jáne orta bızneske qatysty da naqty qadamdar bar. Osy oraıda Maksım Baryshev, Aıtýar Qoshmambetov, Sáken Qarın, Veronıka Daýgalıeva, Janar Súleımenova, Tımýr Járkenov, basqa da azamattarǵa alǵys aıtýymyz kerek. Uzaq ta táýekelge toly jumys, kelissózder oń nátıjesin berdi. Sonymen ShOB úshin ne ózgeredi? Birinshi kezekte, salyq júktemesi jeńildetildi. «Jeńildetilgen salyq rejiminen» alynyp tastalǵandardyń ishinde endi tek 44 qyzmet túri ǵana qalady. Qalǵandarynyń bári qaıtadan jeńildetilgen júıe boıynsha jumys isteı alady.
2026 jyldyń 1 qańtarynan bastap bıznes bárin nólden bastaıdy:
- Tekserýler men kameralyq baqylaýlar joıylady;
- Eger 1 sáýirge deıin negizgi qaryzdy tólep úlgerse, aıyppul men ósimpul eseptelmeıdi;
- QQS boıynsha ákimshilik jaýapkershilik qarastyrylmaıdy;
- Esepten alyp tastaý tekserýsiz jáne kúrdeli prosedýralarsyz júrgiziledi.
Jaqyn kúnderi «Báıterek» holdıngi jańa baǵdarlamany tanystyrmaq – avtomobıl lızıngi jáne memlekettik baǵdarlamalar arqyly ShOB-qa kómek. «Reformalardyń basty maqsaty – árbir otandasymyzdyń ál-aýqatyn arttyrý. Bul – bizdiń negizgi ustanymymyz» dedi Úkimet basshysy. ShOB úshin bul – múmkindikter terezesi. Osy aralyqta strategııany jańartyp, baǵdardy anyqtap, ornyqtylyqty kúsheıtýge tıis.
Bıznespen «sezimge súıenip» aınalysýǵa bolmaıdy. Bıznesti sıfr arqyly basqaryp, úderisterdi júıelep, kompanııa brendin durys qalyptastyryp, operasııalyq máselelerdi jolǵa qoıyp, kórshiler men básekelesterdiń ekspansııasyn eskerý kerek. Báseke kún saıyn ósip kele jatyr jáne bizge qıyndyq týdyrady. Biraq bul bir jaǵynan jaqsylyqtyń nyshany – báseke kúshti bolǵan saıyn bıznes myqty bola túsedi.
Bıznes degenimiz – sıfrlar, júıelilik jáne strategııa. Kún saıyn derektermen, taldaýlarmen jáne josparlaýmen jumys isteý qajet. Eń bastysy, oqýǵa, beıimdelýge jáne áreket etýge daıyn bolý shart. Berilgen ýaqytty tıimdi paıdalanyńyz: qarjylyq josparlaýdy engizip, úderisterdi avtomattandyryp, esep pen baqylaý júıesin quryńyz, brend qalyptastyryp, kompanııańyzdy básekege qabiletti etińiz. Dál qazirgi ShOB-qa berilgen múmkindik – asa baǵaly syımen teń. «Taza paraq» – bıznesti nyǵaıtyp, jańa deńgeıge shyǵarýdyń tamasha múmkindigi. Osyny sátti paıdalanǵan kásipker erteń kóshbasshy atanady. Pálendeı eshteńe bola qoımas dep úmittengen adam artta qalady.
Bizge kúsh jınaýǵa, kásibimizdi retke keltirýge, bilim alýǵa, tıimdi sheshimder men naqty áreketterdi engizýge ýaqyt berildi. Kásipkerdiń eń az degende isteıtin isi – damýǵa kóńil bólýi kerek. Kún saıyn áriptestermen sóılesip, qabiletti, eńbekqor adamdardyń bilimniń joqtyǵynan esesin jiberip jatqanyn kórip, janym aýyrady. Basty problemamyz – bıznesti saýatty júrgize almaımyz. Bul – shyndyq. Qazir árbir qateliktiń quny kúnnen-kúnge qymbattap barady. Sondyqtan júıeli áreket etý óte mańyzdy.
