Jańadan salynǵan keshen ýaqyt suranysyna saı boı kótergenin aıta ketken jón. Keshen aýmaǵynda aýdandyq arhıv, balalar men jasóspirimder ortalyǵy, kitaphana bar. Sonymen qatar fýtbol alańy, voleıbol jáne basketbol oınaýǵa arnalǵan parket te qarastyrylypty.
О́ńir basshysy Erbol Qarashókeevtiń aıtýynsha, jergilikti jurttyń ıgiligi úshin qolǵa alynǵan ilkimdi jobalar ármen qaraı da jalǵaspaq. Ásirese aýdandar men aýyldarda áleýmettik nysandar men keshenderdi salýdyń mańyzy zor.
Jańadan salynǵan balalar men jasóspirimder ortalyǵy aýyl balalarynyń qosymsha bilim alýyna múmkindik týǵyzbaq. Sondaı-aq mundaǵy mamandar jasóspirimderdiń jeke qyzyǵýshylyqtaryn damytýǵa barynsha kómektesedi.
Resmı derekke júginsek, jalpy aýmaǵy 311 sharshy metrdi quraıtyn jańa nysan 150 adamǵa arnalǵan eken. Ǵımaratta 4 oqý jáne 3 ákimshilik bólme qarastyrylǵan. Munda «School Media – jas tilshi», «Kompıýterlik saýattylyq jáne 3D keskindeý», «Jantaný – psıhologııa», sondaı-aq «Energy club – kúsh pen sergektik» úıirmeleri jumys isteıdi. Budan bólek, ınternet-kafe bar.
Eki qabatty jańa kitaphanada jergilikti turǵyndardyń rýhanı suranysyn qanaǵattandyrý úshin barlyq jaǵdaı jasalypty. Munda jalpy oqyrmandarǵa, balalar men jasóspirimderge arnalǵan bólimder, elektrondy oqý zaly, arnaıy májilis zaly, zaǵıp jandarǵa arnalǵan arnaıy kabınet jáne kitap qoryn tolyqtyrý men óńdeý bólimi bar. Al rýhanııat ordasynda 46 800 kitap saqtalǵan. Ýaqyt ótken saıyn mundaǵy kitap qorynyń tolyǵa túsetinine eshkimniń kúmáni joq.
Jergilikti jurt bul aýmaqtan jańa arhıv nysanynyń salynǵanyna qýanyp otyr. Aýdandyq arhıv ǵımaraty eki qabattan turady. Birinshi qabatta bir qoıma men eki qujat qabyldaý bólmesi ornalasqan. Ekinshi qabatta qoıma, konferens-zal jáne jeti qyzmettik kabınet bar.
«Buǵan deıin arhıv salasyna, naqty aıtqanda aýdan tarıhyna qatysty qujattar yńǵaılastyrylǵan ǵımaratta saqtalyp keldi. Bar bolǵany eki bólmede myńdaǵan qujat ornalasty. Al búginnen bastap zaman talabyna saı salynǵan eńseli jańa ǵımaratqa kóship otyrmyz», deıdi aýdandyq arhıvtiń dırektory Kelsinkúl Kúlekeeva.
Oblys ákimi Erbol Qarashókeev mundaǵy sport alańdaryn aralap kórip, aýyl sportyn órkendetýge úles qosyp júrgen jergilikti jastarmen júzdesip, olarǵa arnaıy estelik syılyq tabystady.
«Aýylymyz ýaqyt ótken saıyn kórkeıip keledi. Búgin munda jańa ǵımarattar boı kóterdi. Sport alańdary ashylyp, halyq ıgiligi úshin berilip jatyr. Munyń bári jergilikti atqarýshy bılik ókilderiniń bizge jasaǵan qoldaýy men qamqorlyǵy dep túsinemiz.
Munda sportshylardyń alańsyz jattyǵýyna barlyq jaǵdaı qarastyrylǵan. Endi biz osy jerde jattyǵý arqyly úlken jarystardan oljaly oralýǵa kúsh salamyz. Jergilikti jastarǵa osyndaı jaǵdaı jasap otyrǵan azamattarǵa alǵystan basqa aıtarymyz joq», deıdi jas voleıbolshy Balaýsa Qonaqbaı.
Jambyl aýdanynda bastaý alǵan irgeli joba aldaǵy ýaqytta óńirimizdiń ózge de aımaqtarynda jalǵasatynyna eshkimniń kúmáni joq. О́ıtkeni óńir basshysy aýyl turǵyndarynyń talap-tilegin nazardan tys qaldyrmaıtynyn aıtyp otyr.
Jambyl oblysy
