M.Áshimbaev sarapshylarmen kezdesýde elimizde Memleket basshysynyń bastamasymen aýqymdy jańǵyrtý baǵdarlamasy iske asyrylyp jatqanyn atap ótti. Palata spıkeri Prezıdent júktegen mindetterdi oryndaý úshin memlekettik qurylymdar men saraptaý jáne taldaý qaýymdastyǵynyń kúsh-jigerin biriktirý qajet ekenin de tilge tıek etti. Mundaı qadam Qazaqstannyń sapaly ekonomıkalyq ósýine jáne Parlament qyzmetin jetildirýge tyń serpin beredi.
«Elimizde saıası, ekonomıkalyq jáne áleýmettik salalardy qamtıtyn eleýli ózgerister júzege asyrylyp jatyr. Prezıdent Qasym-Jomart Toqaev halyqqa Joldaýynda bir palataly Parlamentke kóshý máselesin qoǵam men sarapshylar talqylaýyna shyǵardy. Sondaı-aq qazirgi tańda keshendi ekonomıkalyq reformalar da iske asyrylýda. Sonyń aıasynda Salyq jáne Bıýdjet kodeksteri qabyldandy. Sessııa barysynda Parlament Qurylys jáne Sıfrlyq kodeksterdi, sondaı-aq Bankter men bank qyzmeti týraly zańdy qaraıdy. Osy rette qabyldaıtyn sheshimderdi sarapshylarmen birlesip, sapaly taldaýlar arqyly pysyqtaýdyń mańyzy zor», dedi Senat tóraǵasy.
Sonymen qatar M.Áshimbaev sarapshylardyń baǵalaýy men júıeli taldaýsyz sapaly zańnamalyq sheshimderge qol jetkizý múmkin emes ekenin aıtty. Bul rette Taldau qaýymdastyǵy, ıaǵnı – Senat janyndaǵy sarapshylar klýbynyń músheleri men Taldaý mektebiniń túlekteri jáne saraptamalyq-taldaý salasyndaǵy kadrlyq áleýetti nyǵaıtýǵa arnalǵan basqa da jobalar mańyzdy ról atqaratyny anyq.
«Reformalardy sátti iske asyrý jolynda sarapshylar qaýymdastyǵynyń róli aıryqsha mánge ıe. Osyǵan baılanysty Senat birneshe jyldan beri kásibı alańdar qalyptastyryp, bul baǵytta belsendi jumys júrgizip keledi. Sarapshylar klýby, Taldaý mektebi, Taldau Forum, Taldau Talks podkasy sııaqty jobalar sarapshylar qaýymdastyǵyn nyǵaıtýdy kózdeıdi. Bul baǵyttaǵy jumysty ári qaraı da jalǵastyra beremiz. Sonyń aıasynda Taldau Lab, óńirlerdegi Taldaý mektepteri sııaqty bastamalar arqyly jańa formattar men alańdar qurýdy josparlap otyrmyz», dedi M.Áshimbaev.
Kezdesýde Parlament pen analıtıkalyq qaýymdastyqtyń yntymaqtastyǵyn nyǵaıtý máseleleri de jan-jaqty talqylandy. Sonyń barysynda zańnamalyq qyzmetti saraptamalyq turǵydan qamtamasyz etýdi jetildirý jáne ınstıtýttar men basqa da bastamalardy túrli baǵyttar boıynsha nyǵaıtý jumystaryna basa mán berildi. Is-sharada Taldau Lab taldamalyq zerthanasyn qurýǵa jáne Taldau Regions óńirlik baǵytty damytýǵa qatysty usynystar da aıtyldy.
Sapar barysynda Senat tóraǵasy tuńǵysh Abaı ulttyq mektebiniń qurylysymen jáne bilim ordasyn jabdyqtaý jumystarymen de tanysty. Sondaı-aq ol О́ńirlik bochcha federasııasynyń ujymymen kezdesti. Onda elimizde atalǵan paralımpıadalyq sport túrin damytý, sonyń ishinde ınklıýzııa mádenıetin kıno arqyly dáripteý baǵytyndaǵy basymdyqtar sóz boldy. Buǵan qosa Parlament depýtattary «Almaty Museum of Arts» zamanaýı óner murajaıyna arnaıy bardy.
