Búginde halyq arasynda eń tanymal jınaq quraly – bank depozıti. Ulttyq banktiń deregine súıensek, sońǵy bes jylda el azamattarynyń bankterdegi salymy turaqty ósip keledi. Bul azamattardyń bolashaǵyna qarjy bólý mádenıeti qalyptasyp jatqanyn kórsetedi.
Máselen, 2025 jylǵy tamyz aıynyń sońynda jeke tulǵalardyń bank júıesindegi salymdary 26 trln teńgeden asty, bul ótken jylmen salystyrǵanda 17,5%-ǵa nemese 3,9 trln teńgege kóp. Sońǵy úsh jyldaǵy ortasha jyldyq ósim 22,5% bolsa, 2020-2022 jyldary bul kórsetkish 17,7%, al 2017–2019 jyldary 6,6% shamasynda bolǵan. Demek, azamatttar jınaqtaýdyń mańyzyn túsine bastaǵan.
Alaıda eń qıyny jınaýdy bastaý emes, ony únemi jalǵastyryp otyrý. Iаǵnı aldymen jumsaımyn, qalǵanyn jınaımyn degen túsinik qate. Shyn máninde, kerisinshe isteý qajet: tabysty alǵan sátte aldymen belgili bir bóligin jınaqqa jiberip, tek qalǵanyn kúndelikti shyǵyndarǵa bólý kerek. Tipti tabystyń 10%-yn turaqty túrde jınap otyrsańyz, ýaqyt óte kele bul eleýli kapıtalǵa aınalady. Bul kúrdeli paıyzdyń áseri, ıaǵnı aqsha ózińizge tabys ákelip, «jumys isteı» bastaıdy.
Mundaı tásil úı alý sekildi iri maqsattarǵa jetýge de kómektesedi. Júıelilik pen jınaq daǵdysy adamnyń qarjylyq turaqtylyǵyn arttyryp, armandaǵan baspanasyna bir qadam jaqyndatady.
