Kollajdy jasaǵan – Záýresh SMAǴUL ,«EQ»
Oblystyq sıfrlandyrý jáne arhıvter basqarmasynyń basshysy Almas Kópjanovtyń aıtýyna qaraǵanda, shalǵaıdaǵy eldi mekenderdi sapaly ınternet jelisimen qamtý qarqyndy júrgizilip jatyr. Qazir 14 aýyl «OneWeb» spýtnıktik tehnologııasymen ınternet jelisine qosyldy. «Jusan Mobile» AQ-men birge qondyrylǵan tyń tehnologııanyń ıgiligin Isataı aýdanyndaǵy Amangeldi, Aýqaıran, Myńtóbe, Aıbas, Jasqaırat, Qurmanǵazy aýdanynyń Shaıhy, Mahambet aýdanynan Bala Oraz, Keńóris, Esmahan, sondaı-aq Qyzylqoǵa aýdanynda Buqar, Jylyoı aýdanynyń Qarasha aýylynda turatyn turǵyndar kórip otyr.
Al Inder aýdanynyń Jarsýat aýyldyq okrýgindegi Qyzyljar, Aqtan, Ketebaı aýylynda 37 tútin tirkelgen. Bul eldi mekenderdegi 159 turǵyn jańa jyldamdyǵy joǵary ınternet jelisine qol jetkizdi.
«Basty maqsat – turǵyndardyń sapaly baılanys qyzmetin qoldanýyna yqpal etip, aýyldardyń áleýmettik jáne ekonomıkalyq damýyna serpin berý. «Qoljetimdi ınternet» ulttyq jobasynyń 2025–2027 jyldarǵa arnalǵan josparyna sáıkes taǵy 43 aýylǵa talshyqty-optıkalyq kabel arqyly ınternet jelisin tartý kózdeldi. Endi alys aýyldardyń turǵyndary memlekettik qyzmetti onlaın túrde, qashyqtan bilim alý jáne túrli sıfrlyq servısterdi paıdalaný múmkindigine ıe bolady», dedi Almas Kópjanov.
Onyń deregine bıyl baılanys sapasyn arttyrý úshin aýqymdy jumys josparlandy. Onyń ishinde 7 100 abonentti optıkalyq jelige aýystyrý, 31 shaqyrym talshyqty-optıkalyq kabel tartý, 156 bazalyq stansany jańǵyrtý bar. 5G tehnologııasymen 133 bazalyq stansa iske qosylady. Sondaı-aq respýblıkalyq mańyzy bar avtojol sapaly baılanyspen qamtylady. Osy maqsatta Atyraý oblysynda 5 antenna-dińgek qondyrǵysyn ornatylady. Bul jumysty Jylyoı, Mahambet jáne Qyzylqoǵa aýdandary atqarý úshin jobalyq-smetalyq qujattamalar ázirlenip, saraptamadan ótkizildi.
Atyraý oblysy
