Sodan soń taǵy bir qatardaǵy jaýynger Joldas Qurmanǵalıev týraly aıta kelip: «Ol 1897 jyly Almaty oblysy, Lenın aýyldyq keńesi, Lenın kolhozynda týǵan. Frýnze aýdandyq áskerı komıssarıatynan áskerge shaqyrylyp, 126 OSV, - 11A, S-3 maıdany quramynda shaıqasty. 1942 jyly Lenıngrad oblysy, Polavsk aýdany, Ivashevo selosy úshin shaıqasta batyrlyǵymen erlik kórsetip, aýyr jaralandy. Sol jaraqatynyń saldarynan 1942 jyldyń 10 jeltoqsanynda qaza bolyp, Ivashevo selosyndaǵy №18 beıitke jerlendi», – depti Almaty oblysy boıynsha qorǵanys isteri jónindegi departamentiniń bastyǵy, polkovnık Murat Darmanqulovqa joldaǵan hatynda. Sondaı-aq, Máskeý qalasynyń áskerı komıssary V. Shepılov Jeńistiń 70 jyldyǵyna oraı Almas Qurmanǵalıevke týyp-ósken aýyly Uzynaǵashtan bir kósheniń atyn berýdi suraǵan 17.03.2015 j. № ORG 1019 minezdemesin de jiberipti. Qosh. Áskerı qyzmetkerler tól mindetin adal oryndady degen habarmen toqtalmaı maıdangerler týraly maǵlumatty indete túsýimizge urpaǵynyń ulaǵatty isi sebep bolyp otyr. Joldas Qurmanǵalıevtiń shóberesi Rýslan 2014 jyldyń kúzinde atasynyń máıiti jatqan qabir basyna baryp, táý etip, tıisti oryndar kelisimimen bir ýys topyraqty bet oramalyna túıip ákelip, urpaqtarynyń atynan arnap ornatylǵan eskertkish, eńseli mármár tas túbine musylmandyq rásimmen saldy. «Erterekte ákeı de qos arysqa izdeý salǵan eken. Bertinde sheshem Qyztileý oqtyn-oqtyn oıyma sala berdi. Sodan Reseıdegi áriptesterimniń qoldaýymen ulym Rýslandy osynaý ıgilikti isti atqarýǵa múmkindik jasadym. Nátıjesin halyq kórip, alǵystaryn jaýdyrýda», deıdi QR Bas Prokýratýrasy quqyqtyq statıstıka jáne arnaıy esepke alý jónindegi komıteti Almaty oblystyq basqarmasynyń bastyǵy Jumageldi Qurmanǵalıev. Negizi eki memleket arasynda jáne ózge el ishinde erkin júrý, dittegen jerine belgilengen ýaqytta baryp qaıtý úshin qajetti qujattardy rettestirý áý basta kózdegen maqsatqa qalaı da jetýge degen umtylystan týary anyq. Eń bastysy, perzenttik paryzdy óteý bolyp sanalady. Osy tusta basa aıtar bir jaıt – marqum Joldas Qurmanǵalıevtiń súıegi Reseı Federasııasynyń Prezıdenti Vladımır Pýtın týyp-ósken Ivashevo selosynda jerlengendigi bolyp otyr. Sol seloda jalǵyz uly Áýeshannyń qolynan ustap, zaıyby jáne qaıynbıkesimen qatar otyryp túsken fotosýret te qalǵan shyǵar. О́ıtkeni, ishki dúnıesi sezdirdi me eken sol estelik fotosýretke qalaı da túsip, tós qaltasyna salyp áketý Joldas Qurmanǵalıevtiń sheshimi bolypty. Bul fotosýret bizge bir fakt bolyp, urpaǵynyń qundylyǵyna aınaldy. Qoryta aıtqanda, Máskeý qalalyq áskerı komıssarynyń usynysyn biz de qoldap, tıisti oryndar nazaryna usynamyz.
Nurbol ÁLDIBAEV,
«Egemen Qazaqstan».
Almaty oblysy.
