Oblystyq dene shynyqtyrý, sport jáne týrızm basqarmasynyń bólim basshysy mindetin atqarýshy Jannat Sabyrǵalıevanyń deregine súıensek, týrıster arasynda otandastarymyzdyń úlesi basym. О́zge óńirlerden kelýshiler sany 73 myńnan asady. Shetelden kelgen týrıster – 10 myń adam.
– Qazir oblysta 250-den astam týrıstik mekeme jumys isteıdi. Týrısterge 3 mlrd teńgeniń qyzmeti kórsetildi. Atyraý oblysynyń ınvestısııalyq tartymdylyǵy týrızm salasyndaǵy oń dınamıkaǵa serpin berdi. Bıyl óńirlik týrızmdi damytýǵa tartylǵan ınvestısııalyq qarjynyń kólemi 32 mlrd teńgeni qurady. Týrısterdiń qyzyǵýshylyǵyn arttyrý maqsatynda qolǵa alynǵan jobalardyń esebinen ınvestısııa kólemi artyp keledi, – deıdi J.Sabyrǵalıeva.
Onyń aıtýynsha, týrıstik ınfraqurylymdy damytý baǵytynda birneshe jobany iske asyrý jalǵasyn tabady. Aıtalyq, ortaǵasyrlyq Saraıshyq qalashyǵy men Jylyoı aýdanyndaǵy Aqmeshit qorymyna jol salý qolǵa alyndy. Qurmanǵazy aýdanyndaǵy lotos alqabynyń mańyn abattandyrý, sondaı-aq jol boıyndaǵy servıstik qyzmet kórsetetin nysandardy kóbeıtý júrgizilip jatyr.
Týrızm salasyn aqparattyq, ımıdjdik turǵyda ilgeriletýdi kózdegen «Visit Atyrau» týrıstik aqparattyq ortalyǵy quryldy. Ortalyq dırektorynyń orynbasary Lázzat Sultanovanyń aıtýyna qaraǵanda, «Visit Atyrau» saıty úsh tilde jumys isteıdi. Saıtta oblystyń tabıǵı, tarıhı, mádenı nysandary týraly tolyq aqparat bar.
– Biz óńirdiń týrıstik áleýetin keńinen nasıhattaýdy jalǵastyra beremiz. Qazirde týrısterge arnalǵan mobıldi qosymsha daıyndalyp jatyr. Bul qosymsha arqyly saıahatshylar marshrýtyn aldyn ala josparlap, qonaqúı men gıd qyzmetin onlaın brondaı alady. Ortalyq qyzmetkerleri «Zhaiyk Brand Fest», «Atyrau Fish Day», «EthnoWeekend», «Lotus Fest», «Tour de Saraishyq» sekildi óńirlik, halyqaralyq jobalardy uıymdastyrýǵa uıytqy boldy, – dedi L.Sultanova.
Sala mamandarynyń pikirinshe, Atyraýdan Ystanbul, Dýbaı, Amsterdam, Tbılısı, Baký baǵytynda ushatyn turaqty áýe reısteri óńir týrızmin damytýǵa septigin tıgizip otyr. Jaqynda Italııadaǵy Mılan qalasyna tikeleı áýe reısi ashyldy. Bul Eýropadan keletin týrısterdiń kóbeıýine yqpal etedi.
– Atyraý oblysynda kóne dáýirden syr shertetin tarıhı mekender men oryndar kóp. Bul ásirese sheteldik týrısterdi qyzyqtyrady. Sol sebepten, týrısterdi qyzyqtyratyn birneshe máselege basymdyq berilip otyr. Birinshiden, týrızm salasyn jańa deńgeıge kóterýge den qoıyldy. Ekinshiden, servıstik qyzmet kórsetý sapasyn arttyrý qolǵa alyndy. Bir sózben, munaıly óńirdi jetekshi týrıstik ortalyqtyń birine aınaldyrý baǵytyndaǵy jumys jalǵasady, – dedi J.Sabyrǵalıeva.
Atyraý oblysy
