Foto: Erlan Omar
1999 jyly engizilgen AMJ júıesi eldegi áleýmettik saıasattyń ózekti baǵyttarynyń biri. Qoldanystaǵy zańnama boıynsha, járdemaqy 17 túrli sanatqa jatatyn azamattarǵa beriledi. Olardyń qatarynda:
- Uly Otan soǵysynyń ardagerleri men ózge elderdegi áskerı is-qımyldarǵa qatysqandar;
- Uly Otan soǵysynyń ardagerlerine teńestirilgen azamattar;
- Uly Otan soǵysy kezinde qaza tapqan jaýyngerlerdiń áıelderi men qaza tapqan áskerı qyzmetkerlerdiń otbasy músheleri;
- «Halyq qaharmany», «Qazaqstannyń Eńbek Eri» ataqtaryna ıe bolǵandar;
- Tyl eńbekkerleri;
- Chernobyl atom elektr stansııasyndaǵy apattyń saldaryn joıýǵa qatysqandar;
- Saıası repressııalardyń qurbandary, múgedektigi bar adamdar nemese zeınetkerler;
- Qazaqstan Respýblıkasy aldyndaǵy erekshe eńbegi úshin zeınetaqy taǵaıyndalǵandar jáne basqa da azamattar bar.
Eńbek jáne halyqty áleýmettik qorǵaý mınıstrliginiń málimetinshe, járdemaqy mólsheri azamattyń sanatyna qaraı aılyq eseptik kórsetkishtiń (AEK) 2,13-ten 138,63-ke deıingi aralyǵynda belgilenedi. AMJ kólemi jyl saıyn AEK ózgerisine sáıkes, respýblıkalyq bıýdjet týraly zańǵa saı qaıta qaralady.
Eger azamat birneshe sanat boıynsha járdemaqy alýǵa quqyly bolsa, tólem tek bir negiz boıynsha, onyń óz qalaýy boıynsha taǵaıyndalady.
Aıta keteıik, el aýmaǵynda turaqty turatyn shetel azamattary men azamattyǵy joq tulǵalar da bul tólemge Qazaqstan azamattarymen birdeı quqyqqa ıe. AMJ rásimdeý úshin ótinishti eGov.kz portaly arqyly nemese halyqqa qyzmet kórsetý ortalyqtary arqyly tapsyrý jetkilikti.
