Jańa erejeler jobasyna sáıkes, bankter qaryz alýshynyń mindetti áleýmettik medısınalyq saqtandyrýǵa, mindetti áleýmettik saqtandyrýǵa jáne basqa da mindetti tólemderge qaryzy bar-joǵyn tekserýge tıis. Bul málimetter qaryz alýshynyń táýekeldik profılin qalyptastyrý kezinde esepke alynady jáne nesıe berý sheshimine yqpal etýi múmkin.
Qujatta kórsetilgendeı, mindetti áleýmettik medısınalyq saqtandyrý júıesi iske qosylǵannan beri kópshilik azamattarda turaqty qarjylyq tártip qalyptasqanymen, keıbir adamdarda tólem boıynsha qaryzdar jınalyp qalǵan.
«Mindetti áleýmettik medısınalyq saqtandyrýǵa tólem jasamaý bankter úshin qosymsha táýekelder týǵyzady. Sebebi mindetti tólemderdi ýaqytyly nemese ádeıi tólemeý qaryz alýshynyń qarjylyq jaýapkershiliginiń tómendigin kórsetedi jáne onyń nesıe mindettemelerin buzý yqtımaldyǵyn arttyrady», delingen qujatta.
Sonymen qatar, mindetti áleýmettik medısınalyq saqtandyrýǵa jarna tólemegen azamattar saqtandyrý júıesi arqyly medısınalyq kómekke qol jetkize almaıdy. Bul jaǵdaı aýrýǵa shaldyǵý, eńbekke jaramsyzdyq nemese múgedektik týyndaǵan kezde olardyń tólem qabilettiligin tómendetip, bankter úshin kredıttik táýekelderdi kúsheıtedi.
Jańa talaptar mynadaı kólemdegi nesıelerge qoldanylady:
- Iri bankter úshin (kapıtaly 100 mıllıard teńgeden joǵary) – qaryz alýshynyń nesıe jáne shartty mindettemeleriniń jalpy somasy banktiń kapıtalynyń 0,01 paıyzynan assa;
- Kapıtaly tómen bankter úshin – bul kórsetkish 0,02 paıyzdan assa.
Osyndaı qaryz alýshylarǵa bank keńeıtilgen taldaý júrgizedi. Endi bul taldaýǵa mindetti áleýmettik medısınalyq saqtandyrý boıynsha qaryzdar týraly aqparat resmı túrde engiziledi.
