Qazaqstan shahmat federasııasy uıymdastyrǵan bul týrnır pedagogterdi qoldaýǵa, olardyń kásibı ári ıntellektýaldy damýyn yntalandyrýǵa, sondaı-aq qoǵamdaǵy rólin kúsheıtýge baǵyttalǵan.
Qazaqstan shahmat federasııasynyń birinshi vıse-prezıdenti Dármen Sádýakasov týrnır joǵary deńgeıde ótkenin jetkizdi.
«Bul tek jarys emes, shahmatqa degen súıispenshilik pen pedagogıkalyq mıssııa úılesim tapqan erekshe týrnır. Saıys bastaýysh synyp muǵalimderiniń ıntellektýaldy áleýetin arttyryp, balalardyń negizgi bilim men daǵdylaryn qalyptastyrýdaǵy ustazdardyń biliktiligin aıqyndaıdy», dedi D.Sádýaqasov.
Intellektýaldy saıysta Kenjeǵalıeva Gúlbarshyn (Atyraý oblysy, Qurmanǵazy aýdany, Nurjaý jalpy orta mektebi) jeńimpaz atansa, kúmis júlde
Jumadilova Aıgerimge (Shymkent qalasy, T. Ryskýlov atyndaǵy №25 mektep-gımnazııasy), qola medal Esenbaeva Juldyzǵa (Almaty qalasy, №185 mektep-gımnazııasy) buıyrdy.
Búginde shahmat elimizdiń bilim berý salasynda mańyzdy rólge ıe. Úkimettiń keshendi jospary aıasynda eldegi 1500-den astam mekteptiń oqý baǵdarlamasyna «Shahmat negizderi» páni engizilgen, al 60 myńnan astam oqýshy arnaıy daıyndyq kýrstarynan ótken muǵalimder jetekshiligimen strategııalyq saıysty damytýda.
Shahmatty damytýdyń mańyzdylyǵyn Memleket basshysy da árdaıym aıtady. Halyqaralyq shahmat federasııasynyń (FIDE) prezıdenti Arkadıı Dvorkovıchti qabyldaǵanda Qasym-Jomart Toqaev elimizde shahmat tek sport qana emes, ıntellektýaldy mádenıet, tárbıe men bilim berý júıesiniń ajyramas bóligi ekenin ataǵan bolatyn. Sondaı-aq shahmat ınfraqurylymyn damytý men ony balalar men jastar arasynda nasıhattaýdyń mańyzy zor ekenin de aıtqan-dy.
