Qylqalam sheberi, Memlekettik syılyqtyń laýreaty, Almaty oblysynyń qurmetti azamaty, Qazaqstannyń eńbek sińirgen qaıratkeri, jýrnalıst Januzaq Músápirdiń anasy, ulaǵatty tulǵa Uljamal Mamytqyzynyń 100 jyldyǵyna oraı ózi negizin qalaǵan galereıada myń túrli boıaýǵa qanyq kartınalary oryn alǵan «Ana – ǵumyrdyń boıaýly jalǵasy» atty kórmesi kópshilik nazaryna usynyldy. Sondaı-aq ultymyzdyń óshpes ónerin arqalaǵan taýdaı azamatty dúnıege ákelip, ósirgen ata-anasynyń ómir jolyn sýrettegen «О́mir syry» atty kitabynyń tusaýkeser rásimi ótti. Máni zor mádenı is-sharaǵa elimizdiń zııaly qaýym ókilderi, qoǵam qaıratkerleri men sýretshiniń týma-týys, dos-jaran, áriptesteri qatysty.
Saltanatty jıynda sóz bastaǵan Senat depýtaty Ǵalıasqar Sarybaev ónersúıer qaýymǵa Senat tóraǵasy Máýlen Áshimbaevtyń júrekjardy quttyqtaýyn jetkizdi. Quttyqtaý hatta qylqalam sheberi Januzaq Músápirdi mazmundy mádenı is-sharanyń ótýimen quttyqtaı kele, otbasylyq qundylyqtardy nasıhattaýǵa jáne ata-anany qurmetteýge arnalǵan ıgilikti isterge únemi uıytqy bolyp, bul baǵytta kópke ozyq úlgi kórsetip kele jatqany atap aıtylǵan.
«Shyǵarmańyz arqyly qazaq áıeliniń qaısarlyǵyn, parasatyn, tabandylyǵyn dáripteýde jáne analardyń otbasy men ult aldyndaǵy rólin ulyqtaýǵa úlken úles qostyńyz. Qalyń oqyrmanǵa jol tartqan «О́mir syry» kitabyńyz – osy baǵyttaǵy uzaq jylǵy izdenistiń nátıjesi. Bul eńbek qoǵamda rýhanı qundylyqtardy odan ári jalǵastyrýǵa oń septigin tıgizedi dep senemiz. Kitaptyń taǵylymǵa toly tereń mazmuny tulǵa retinde ósýge jáne urpaq tárbıesindegi jaýapkershilikti sezinýge tyń serpin beredi», delingen quttyqtaý hatta.
Odan keıingi kezekte Almaty oblysy ákiminiń orynbasary Ǵanı Maılybaev ta óńir basshysynyń ystyq lebizin jetkize kele, ana ómirdiń altyn qazyǵy, otbasynyń uıytqysy, urpaq tárbıesiniń bastaýy, sol sebepti analar eńbegin dáriptep, olardyń ulaǵatty ǵumyryn jas urpaqtyń sanasyna sińirý qoǵam aldynda mańyzdy mindettiń biri ekenin tilge tıek etti. Osy turǵyda qazaq mádenıeti men ónerine ólsheýsiz úles qosyp kele jatqan Januzaq Kerimbekulynyń ana kelbetin beınelegen kórkem týyndylary ulttyń rýhanı bolmysy, ata dástúri dáriptelgen asyl qazyna ekenin aıryqsha atady.
«Táýelsizdik kúnimen tuspa-tus kelgen búgingi is-sharanyń mańyzy óte zor. Erekshe sezimdemiz. Sebebi júz jyldyǵy atalyp otyrǵan Uljamal anamyzdyń kelisti kelbetinen qazaq áıeliniń san ǵasyrlyq bet-beınesi, qaısarlyǵy, tabandylyǵy, sulýlyǵy, qut-berekesi men daladaı keń peıili kórinis tapqan. Bul sýretshiniń úlken sheberligi», degen Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen respýblıkamyzda aıryqsha mańyzǵa ıe «Anaǵa qurmet» mýzeıiniń jumysyn nasıhattaý qajettigin atap ótti.
Tolqynysqa toly mádenı is-shara barysynda sóz tizginin alǵan qoǵam qaıratkerleri men óner ókilderi qudiretti qylqalam arqyly anasynyń ǵumyryn jalǵaǵan Januzaq Músápirdiń shyǵarmashylyǵyna boılap, onyń qazaq rýhanııatynyń qazynasyna qosqan qaıtalanbas baı týyndylary, sonyń ishinde «Balalyqtan danalyqqa jol» atty birtutas toptamasy týraly da tebirene tıek aǵytty. Ony avtordyń sýretshilik óneriniń bıik shyńyna balady.
Taǵylymdy is-shara sońynda kesh qonaqtarynyń qatysýymen «О́mir syry» kitabynyń alqyzyl lentasy qıylyp, oqyrmanǵa jol tartty.
«Bizdiń osyndaı uly merekeni toılaýymyz, shyǵarmashylyq jumyspen aınalysýymyz, elimizdiń bolashaǵynan úlken úmit kútýimiz, syı-qurmetke bólenýimizdiń barlyǵy da Táýelsizdigimizdiń arqasy dep esepteımin. Alataýdyń eteginde tamasha jerde ornalasqan mýzeıge talaı jerdi aralap kelgen «Meniń anam – Uljamal» atty portretti syıǵa tartyp otyrmyn. Ondaǵy maqsat, birinshiden, mýzeı qoryn baıytý, ekinshiden, erteńgi urpaq ata-babalarymyzdyń beıneleý óneri salasyndaǵy klassıkalyq beınesin osy kartına arqyly kórip, uǵynar degen oıdamyn. Sonymen qatar ónerde eki tizgindi teń ustap kelemin. Sonyń biri aldymen sýretshi bolsam degenim, odan keıin jýrnalıstıka salasynda 30 jyldan asa eńbegimniń bar ekeni belgili. «О́mir syry» atty otbasylyq qundylyqty arqaý etken kitabym ákem men anamnyń ónegeli ómiri men ósıeti týraly syr shertedi», degen Memlekettik syılyqtyń ıegeri, qylqalam sheberi Januzaq Kerimbekuly is-shara qonaqtaryna rızashylyǵyn bildirdi.
Elimizge tanymal tulǵalardy ómirge ákelip, jetkizgen aıaýly analardyń esimin ardaqtap, olardyń turmysta qoldanǵan zattaryn kópshiliktiń nazaryna usynyp otyrǵan «Anaǵa qurmet» mýzeıiniń turaqty qory 100 jyldyq mereıtoıy atalǵan Uljamal Mamytqyzynyń kóztartar kıimi, tigin mashınasy, jeke qujattary men sandyqshalary, samaýryny syndy jeke zattarymen tolyqty.
Almaty oblysy
