Jyl basynan beri qysqamerzimdi ekonomıkalyq ındıkator 118,6%-dy qurady. Investısııalar 2,1 trln teńgege jetti, ósim 23,6%, onyń ishinde 66%-y – jeke ınvestısııalar. Shaǵyn jáne orta bıznes qala ekonomıkasynyń negizi bolyp qala beredi, sonymen qatar jalpy aımaqtyq ónimniń 72%-yn, jumys oryndarynyń 70%-yn qamtamasyz etedi. 73 myńnan astam turaqty jumys orny quryldy. Jumyssyzdyq deńgeıi 4,3%-dy qurady, bul respýblıkalyq kórsetkishten 0,3%-ǵa tómen. 3,9 mln sharshy metr turǵyn úı salyndy, bul búkil el kóleminde tapsyrylǵan turǵyn úı qorynyń tórtten biri.
«Halyq sanynyń jyl saıynǵy ósimi jergilikti atqarýshy bılikke úlken jaýapkershilik júktep otyr. Qarasha aıynda halyq sany 1,6 mln adamnan asty. Orta eseppen elorda turǵyndary jyl saıyn shamamen 7%-ǵa nemese 100 myń adamǵa artady. Ishki kóshi-qon esebinen elordaǵa kúnine 200 myńnan astam adam keledi. Sondaı-aq 100 myńǵa jýyq tirkelmegen azamat bar. Turǵyndar sanynyń artýy ınfraqurylymnyń da jan-jaqty damýyn talap etedi. О́zderińiz biletindeı, eki jyl buryn qala sý men jylý qýatynyń jetispeýshiligine tap boldy», degen qala basshysy bul baǵytta atqarylyp jatqan jumystardyń retin málim etti.
Aıtalyq, №3 sorǵy-súzgi stansasy men Astana sýqoımasynan ekinshi sý qubyry jelisiniń aıaqtalýynyń arqasynda qosymsha táýligine 60 myń tekshe metr aýyzsý qamtamasyz etildi. Jalpy alǵanda, qalanyń sý tutyný kólemi táýligine 350 myń tekshe metrdi quraıdy. Bıyl tórtinshi sorǵy-súzgi stansasynyń qurylysy bastaldy, ol qalany aldaǵy ondaǵan jyl boıy turaqty sýmen jabdyqtaýdy qamtamasyz etedi.
«Birinshi káriz-tazartý stansasynyń da qýaty artyp keledi. Indýstrııalyq park, Kóktal, О́ndiris turǵyn alaptarynda jergilikti káriz-tazartý qurylǵylary jobalaryn júzege asyryp jatyrmyz. Bul jobalardy 2027–2029 jyldar aralyǵynda aıaqtap, sý burý máselesin tolyqtaı sheshemiz», dedi J.Qasymbek.
Jańa jylý kózderin engizý jylý júıesiniń qýatyn 34%-ǵa arttyrdy. Jylytý maýsymy shtattyq rejimde, qalypty ótip jatyr. Jylý qýattaryn saqtap qalý maqsatynda jańa «Telman» gaz jylytý stansasynyń qurylysy júrgiziledi. Sondaı-aq ekinshi jylý elektr ortalyǵyn keńeıtýge daıyndyq, úshinshi jylý ortalyǵynyń kelesi kezegin josparlaý bastaldy.
Memleket basshysynyń tapsyrmasyna sáıkes elordany gazdandyrý aıaqtalyp keledi. Qalanyń 95%-y qamtylyp, gaz 14 turǵyn alapqa jetkizildi. Kelesi jyly 100%-ǵa jetedi.
«Taza Qazaqstan» jalpyulttyq aksııasyn júzege asyrý júıeli jalǵasyp jatyr. Jyl boıy 328 zańsyz qoqys úıindisi joıylyp, 120 myń tonnadan astam qaldyqtar shyǵaryldy. Kelesi jyldyń ekinshi toqsanynda sheteldik ınvestorlarmen birlesip, táýligine 2 250 tonnaǵa deıin qoqys jaǵatyn zaýyt salýǵa kirisemiz, kásiporyn elektr energııasyn da óndiredi. Zaýyt 2028 jyly iske qosylady», dep atap ótti qala ákimi.
Astanadaǵy kúlbilteli máseleniń biri – kólik júıesi, qala joldaryndaǵy keptelis, kúndelikti jolaýshylar tasymaly. Elordada 437 myń avtokólik tirkelgen. Oǵan qosymsha kúnine 90 myńnan astam tranzıttik kólik quraly kiredi. Máseleni sheshý maqsatynda jol-kólik ınfraqurylymyn jaqsartý jónindegi naqtyly Jol kartasy ázirlengen. Qazirde jolaýshylar kóligindegi júrginshiler sany – 43%. Ákimdik bul kórsetkishti 65%-ǵa deıin kóterýdi josparlap otyr. Bıyl 422 avtobýs satyp alyndy, avtopark 1 749 birlikke deıin ósti.
Qalyń buqaranyń aıryqsha nazaryndaǵy LRT jumysy testilik rejimde jumys istep jatyr. Jyl aıaǵyna deıin barlyq vagon jetkiziledi. Stansalardyń ishin árleý jumysy aıaqtalyp keledi. Eki aıdyń ishinde daıyndyq tolyq tııanaqtalady. Keler jyly LRT jolaýshylar tasymaldaı bastaıdy.
Bıyl 14 km jańa jol salyndy, 60 km jol jóndeýden ótti. Qalanyń ıntellektýaldy kólik júıesi belsendi damyp keledi. Baǵdarshamdardyń 40%-y avtomatty rejimde jumys isteıdi. 2026 jyly bul kórsetkish 82%-ǵa jetedi.
Júktemesi joǵary mektepter máselesi kezeń-kezeńimen sheshilip keledi. Bıyl 9 mektep paıdalanýǵa berildi. 2026 jylǵa jalpy qýattylyǵy 16 myń oqýshy ornyna eseptelgen taǵy 12 mekteptiń qurylysy josparlanǵan. Memleket-jekemenshik áriptestigi tetigi aıasynda jańa balabaqshalar ashylyp jatyr.
Medısınalyq ınfraqurylym tapshylyǵy áli de saqtalyp otyr. Bul máseleni sheshý maqsatynda Esil, Nura aýdandarynda eki emhana, Almaty aýdanynda perınataldyq ortalyq, jańa kópsalaly qalalyq aýrýhana, Esil aýdanynda balalarǵa arnalǵan travmatologııalyq pýnkttiń qurylysy bastalady. Qalalyq №2 aýrýhananyń qabyldaý-dıagnostıkalyq kesheniniń qurylysy aıaqtalýǵa jaqyn. Sondaı-aq Saryarqa aýdanynda perınataldyq ortalyq salý jobasy júzege asyrylyp jatyr.
Sporttyq nysandar jelisi qarqyndy damyp keledi. Ortalyq saıabaqta Inklıýzıvti sport ortalyǵy men Shańǵy bazasy ashylmaqshy. «Qazaqstan» sport saraıy men Q.Muńaıtpasov atyndaǵy stadıondy qaıta jańǵyrtý jumysy jalǵasyp jatyr, olardyń aıaqtalýy kelesi jylǵa josparlanǵan.
«Jumysymyzdyń eń mańyzdy baǵyttarynyń biri – qalalyq ortany abattandyrý, kógaldandyrý. Osy maqsatta mynadaı baǵdarlamalyq qujattar ázirlendi: elordanyń brendbýgi, Kógaldandyrý jarǵysy, «Baqshaly qala», «Jańa kelbet», «Jaıly aýla», «Renovasııa». Olar qalalyq keńistikti damytýdyń barlyq baǵytyna qatysty birtutas tásilderdi aıqyndaıdy», dep atap ótti J.Qasymbek.
Jekemenshik ınvestorlar tartý arqyly qanatqaqty joba aıasynda eski turǵyn úı qoryn qaıta jańǵyrtý jumysy bastaldy. Bul aldaǵy jyldary, ásirese, eski úıleri bar aýdandardy jańartýǵa múmkindik beredi. Mysaly, Baıqońyr aýdanynda ınvestorlarǵa renovasııaǵa arnalǵan 21 jer ýchaskesi bólingen. Kelesi jyly osy jerde Asan qaıǵy kóshesin salý josparlanyp otyr. Bıyl 170 qoǵamdyq keńistik abattandyryldy, 1,1 mln-nan astam jasyl jelek otyrǵyzyldy. Jumys qalany kógaldandyrý tujyrymdamasyna sáıkes júrgizildi.
«Biz jekelegen abattandyrýdan kóship, «fasadtan fasadqa» qaǵıdatymen kósheler keńistigin keshendi qalyptastyrýǵa baǵyt ustanyp otyrmyz. Munda jaıaý júrginshiler, velosıpedshiler, kólik qozǵalysy, jaryqtandyrý, navıgasııa, kógaldandyrý eskeriledi», dedi qala ákimi.
Sonymen qatar ınklıýzıvti ortany damytýǵa basymdyq berilip, barlyǵyna qoljetimdi, teń jaǵdaılar jasalyp jatyr. Bıyl ashylǵan «Greenline gúlzary» jobasynyń birinshi kezeńi osy tásildiń úlgisi boldy. Joldyń ornyna jańbyr baqtary men jasandy toǵandary bar jaıaý júrginshiler aımaǵy quryldy. Sporttyq jaǵalaý men Atatúrik jaǵalaýyn abattandyrý aıaqtaldy. Aqbulaq arnasy arqyly jaıaý júrginshiler kópiri salynyp jatyr. Beıbitshilik pen kelisim parki, Aqorda aldyndaǵy alań, Syǵanaq kóshesi, Máńgilik el dańǵyly jobalary kúndelikti paıdalanýǵa yńǵaıly keńistikterge baǵyttalǵan.
«Jyldy qorytyndylaı kele, alda áli de aýqymdy ister atqarý kerektigin tereń túsinemiz. 2026 jyly qalanyń ekonomıkalyq ósimin qamtamasyz etý, elordanyń kólik júıesin kúsheıtý, áleýmettik ınfraqurylymdy damytý mindeti tur», dep túıindedi baıandamasyn qala ákimi.
Baspasóz máslıhatynyń sońynda bas qalanyń basshysy buqaralyq aqparat quraldary ókilderiniń san salaly suraǵyna muqııat jaýap berdi.
